Aral-Syrdarııa basseıni boıynsha 2030 jylǵa 36 myń tonna taýarly balyq óndirý kólemin ósirý josparlanǵan. Bıyl Túrkistan oblysynda taýarly balyqty ósirý kólemin 6 112 tonnaǵa, al Qyzylorda oblysynda 409 tonnaǵa jetkizý kózdelgen. Bul týraly Aral-Syrdarııa oblysaralyq basseındik balyq sharýashylyǵy ınspeksııa basshysynyń orynbasary Janqoja Saparov aıtty.
Aral-Syrdarııa basseıni balyq sharýashylyǵyna halyqaralyq mańyzy bar Shardara sý qoımasy men Syrdarııa ózeni, Kóksaraı sý rettegishi jáne Kishi Aral teńizi aýmaǵyn qamtıdy. Qyzylorda oblysynda Kishi Aral teńizi men 207 sý aıdynynyń 89 paıyzy, al Túrkistan oblysy boıynsha Shardara sý qoımasy men Syrdarııa ózeni jáne 127 sý aıdynynyń 71 paıyzy paıdalanýshylarǵa bekitilip, balyq sharýashylyǵymen aınalysýda. О́tken jyly Qyzylorda oblysynda 184,0 tonna, al Túrkistan oblysynda 5 707 tonnaǵa jýyq taýarly balyq ósirilgen. Sondyqtan bolar Túrkistan oblysy jasandy balyq ósirýge áleýeti joǵary aımaq bolyp sanalady. Inspeksııa basshysy orynbasarynyń sózine qaraǵanda, bıyl onyń kólemin 6 myń tonnadan asyrý josparlanǵan.
Memleket tarapynan sýbsıdııalaý 30 paıyz jáne 50 paıyzǵa artyp, balyq sharýashylyǵynyń damýyna ońdy yqpalyn tıgizýde. Aldaǵy ýaqytta elimizde balyq sharýashylyǵymen aınalysýǵa nıetti kásipkerler sany artatyny sózsiz.
«2021 jyldan bastap sýbsıdııalaý baǵdarlamasynda balyq jemin satyp alýdyń 30 paıyzynan bólek, bıologııalyq negizdemeni ázirleý, balyq ósirý materıalyn satyp alý, dárilik preparattardy satyp alý, analyq-tolyqtyrý úıirin satyp alýdyń 50 paıyzy qarastyrylǵan. Budan bólek balyq ósirýshi sýbektisiniń ınvestısııalyq salymdarynyń 25 paıyzy sýbsıdııalanady», dedi Janqoja Ramberdiuly.
Aral-Syrdarııa basseıni boıynsha 2021 jyly 90 jobany iske asyrý kózdelgen. Byltyr 2 sharbaqtyq, 6 toǵan sharýashylyǵy jáne 1 tuıyq sýmen qamtamasyz etilgen júıe iske qosylǵan. Taýarly balyq ósirý sharýashylyqtarynyń sany 101-ge, toǵan sharýashylyǵynyń sany 47-ge, sharbaqtyq 5-ke, tuıyq sýmen qamtamasyz etilgen balyq sharýashylyǵy 3-ke jetken. Bıyl 6 toǵan sharýashylyǵy jumysyn bastaǵan. Toǵandarda tuqy, dóńmańdaı, aq amýr jáne afrıkalyq jaıyn shabaqtary ósirilýde. Inspeksııa basshysy orynbasarynyń aıtýynsha, ekinshi jartyjyldyqta sharbaqtyq sharýashylyq pen tuıyq júıeli sýmen qamtamasyz etilgen qurylǵynyń jobasy iske asyrylady.
Túrkistan oblysy jasandy balyq ósirý boıynsha elimizde kósh bastap tursa, Qyzylorda oblysyndaǵy tabıǵı sý aıdyndarynda ósirilgen balyq ónimderine degen suranys kún saıyn artyp keledi.