Ýkraınadaǵy soǵystyń bastalǵanyna júz kúnge jýyqtady. Reseı áskeri Ýkraına aýmaǵynyń 20 paıyzǵa jýyǵyn basyp aldy. Qazirgi tańda Donbasta qııan-kesken urys júrip jatyr. Ásirese Severodonesk qalasyndaǵy jaǵdaı qıyn.
Ulybrıtanııa barlaý qyzmetiniń málimetine súıensek, Reseı Severodonesk qalasynyń kóp bóligin basyp alǵan. Lısıchansk qalasyna aparatyn jol Ýkraınanyń baqylaýynda. Reseı áskeri artıllerııamen toqtaýsyz atqylaýdyń arqasynda alǵa ilbip jyljyp keledi. Biraq shyǵyny orasan dep esepteıdi Ulybrıtanııa barlaý qyzmeti.
Lýgansk oblysyn tolyqtaı baqylaýǵa alyp, bar qýatyn Donesk oblysyna salý úshin Reseı tarapy Severskıı Dones ózeniniń batys jaq betine ótýi qajet. Qazirgi tańda ózen basqynshy áreketke tabıǵı túrde tosqaýyl bolyp otyr. Jalpy ótkelderdiń kóbi Severodonesk pen Lısıchansk qalalary mańynda ornalasqan. Sondyqtan atalǵan shaharlardy basyp alý Reseı úshin asa mańyzdy. Biraq Ulybrıtanııa barlaý qyzmeti Ýkraına tarapy ózenderdegi ótkelderdiń bárin baqylaýda ustap otyrǵanyn alǵa tartady.
Ýkraına prezıdenti Volodımır Zelenskıı Lıýksembýrg parlamentiniń depýtattary aldynda sóz sóılep, batys elderine kómek kórsetkeni úshin alǵys bildirdi. Onyń aıtýynsha, soǵys bastalǵaly Reseı áskeri 3620 eldi mekendi basyp alǵan. Sonyń 1017-si azat etildi. Endi 2603 eldi mekendi bosatý qajet.
«Qazirge deıin elimizdiń shamamen 20 paıyzy, 125 myń sharshy shaqyrym jer basqynshylardyń baqylaýynda. Bul «Benılıýks» elderiniń báriniń aýmaǵynan áldeqaıda kóp. Shamamen 300 myń sharshy shaqyrym jerde jarylmaǵan mınalar men snarıadtar bar», dedi ol.
Volodımır Zelenskıı aıtqan «Benılıýks» elderine Belgııa, Nıderland jáne Lıýksembýrg kiredi. Onyń jalpy aýmaǵy shamamen 74 myń sharshy shaqyrymǵa teń. Osy oraıda, Zelenskıı Ýkraınadaǵy maıdan shebi myńdaǵan shaqyrymǵa jetetinin málimdedi. Ýkraına prezıdenti óz sózinde Lıýksembýrgke qarý-jaraqpen kómekteskeni jáne Reseıge qarsy sanksııalardy qoldaǵany úshin alǵys aıtty. Sondaı-aq Ýkraınanyń Eýropalyq odaqqa múshelikke ótýin qoldaýǵa shaqyrdy.
Irlandııa parlamentiniń joǵarǵy palatasy Reseıdiń Ýkraınadaǵy áreketterin genosıd dep tanydy. Bul týraly Senat spıkeri Mark Deılı habarlady. «Reseı Federasııasynyń Ýkraınaǵa zańsyz basyp kirýi – genosıd áreketi. Irlandııa senaty Reseıdiń Ýkraınadaǵy genosıdine qatysty qarar qabyldady», dep jazdy Deılı Twitter-degi paraqshasynda.
«Fýtbol koroli», aty ańyzǵa aınalǵan brazılııalyq fýtbolshy Pele Vladımır Pýtınnen Ýkraınadaǵy qaqtyǵysty toqtatýdy talap etti. Dańqty sportshy úndeýin Ýkraınanyń fýtboldan ulttyq quramasy álem chempıonatynyń irikteý matchynda Shotlandııany jeńgennen keıin jarııalady.
«Búgin Ýkraına eldi sharpyǵan tragedııany kem degende 90 mınýtqa umytýǵa tyrysty. Álem chempıonatyna qatysý joldamasyn ıelený ońaı sharýa emes. Biraq kóp adamnyń ómiri qyl ústinde turǵanda mundaı básekege qatysý múldem qıyn. Basqynshylyqty toqtat! Zorlyq-zombylyqtyń jalǵasýyn aqtaýǵa múldem bolmaıdy», dep jazdy «Fýtbol koroli» ınstagramdaǵy paraqshasynda.
Pele sondaı-aq 2017 jyly Pýtınmen kezdeskenin, jyly sóılesip, uzaq qol alysqanyn eske túsirdi. «Kezdesken kezde eshqashan dál búgingideı pikirimiz ekige jarylatynyn oılamappyn. Qaqtyǵysty toqtatý óz qolyńda», deıdi Pele.
Germanııanyń burynǵy kansleri Angela Merkel de Ýkraınadaǵy soǵys týraly pikir bildirdi. Ol qaqtyǵysty «aıýandyq soǵys» dep atap, ony tez arada toqtatý kerek dep málimdedi.
«Reseı Ýkraınaǵa shabýyl jasap, basyp alyp jatyr. Men Ýkraınanyń ózin-ózi qorǵaý quqyǵyn qoldaımyn», dedi A.Merkel. Eks-kansler Eýropalyq odaq múshelerin birlikke shaqyryp, Germanııa bıliginiń qaqtyǵysty toqtatýǵa baǵyttalǵan áreketterin qoldaıtynyn jetkizdi.