Egemendik etalony

Iá, ýaqytynda azattyqtyń alaýyndaı bolǵan Qazaqstannyń Týyn kórgenderdiń alqymyna jas tyǵylǵan da bolar. Bul kúndi ǵumyryn ult azattyǵy úshin kúreske arnaǵan Alash ardaq­tylary armandaýmen ketti. Al biz endi osy kók Týdyń astyn­da bir atanyń balasyndaı, bir qoldyń salasyndaı bas qosamyz.   

Osydan otyz jyl buryn Qazaqstan Prezıdenti Nur­sul­tan Nazarbaev «Qazaq­stan Respýblıkasynyń Memleket­tik týy týraly», «Qazaqstan Respýblıkasynyń Memle­ket­tik eltańbasy týraly» jáne «Qazaqstan Respýblıkasy Mem­lekettik ánuranynyń mýzy­kalyq redaksııasy týraly» zańdarǵa qol qoısa, 2007 jyly «Qazaqstan Respýblıkasynyń Memlekettik rámizderi týraly» zań qabyldandy. Sodan beri 4 maýsym Memlekettik rámizder kúni retinde merekelenip keledi.

Sháken Nııazbekovtiń qol­tańbasymen dúnıege kelgen Memlekettik týymyz, Jan­darbek Málibekov pen Shot-Aman Ýálıhanovtyń tól týyn­dysy retinde tanylǵan El­tań­bamyz qaı kezde de eldiń el­digin aıqyndap turady. Kók Tý men eńseli Eltańbaǵa qara­ǵanda boıyńdy shattyq sezi­mi kernemeýi, marqaıyp masat­tanbaýyń áste múmkin emes.

О́ıtkeni memlekettik rá­­mizder – azat eldiń maq­ta­nyshy. Al áýelde Mu­qan Tólebaev, Evgenıı Brý­sılovskıı, Latıf Hamıdı úsh­tiginiń áýenine, Muzafar Álimbaev, Qadyr Myrza-Áli, Tumanbaı Moldaǵalıev, Jadyra Dáribaevalardyń sózine jazylǵan alǵashqy Gımn 2006 jylǵa deıin azat eldiń aıbynyn asyrsa, 2006 jyly Prezıdent Nursultan Nazarbaevtyń bastamasymen Parlament aqyn Jumeken Nájimedenovtiń sózine jazylǵan Shámshi Qal­daıaqovtyń «Meniń Qa­zaqstanym» ánin Memleket­tik Gımn retinde bekitti.

Búgingi qazaq týymen maq­tanady. Olaı deýimizdiń ózindik sebebi de bar. Eldiń tut­qasyn ustaǵan Memle­ket basshysy resmı sapar­larmen shet memleketterge barǵanda kók Týymyz kókte qalyqtasa, sportshylary­myz halyqaralyq báseke­lerde atoı salǵanda baı­ra­ǵymyz bıikte jelbirep, Án­uranymyz shyrqalady. Mundaıda boıdy kernegen maqtanysh sezimi janarǵa jas úıiretini de bar... О́ıtkeni kókte tý ǵana emes, qazaqtyń ózi sekildi azat qus qyran da qalyqtap bara jatqandaı bolady da turady.

Sport demekshi, Keńes Oda­ǵynyń qura­mynda Mıýn­hen men Máskeý Olımpıada­syn­da atoı salǵan Áljan Jar­muhamedov (basket­­bol) pen klassıkalyq kúres­te qar­sy­las shydatpaǵan Jaqsy­lyq Úshkempirov atoı sal­ǵan kezde qyzyl ımperııanyń týyn kóterip turyp: «Azat eldiń týy qashan jel­bireıdi» dep oıla­ǵan da shyǵar. Ál­jandy qaı­dam, Jaqańmen suh­bat­tasqanda: «Búgingi sport­shy­lar baqytty ǵoı. Ja­han­dyq ja­rys­tar­ǵa táýel­siz eldiń týy astynda barady» degen edi. Sol sózinen-aq onyń egemen eli­miz­diń rá­­­miz­derine degen qurmeti bó­lektigi baı­qa­latyn.

Qazaq oǵlandary arasynan alǵashqy ret boksshy Bekzat Sattarhanov Sıdneı Olım­pıadasynda atoı salyp, Ánuranymyzdy asqaq­tatyp, Kók Týymyzdy jelbiretti. Ras, Bekzatqa deıin Lılle­hamerde ótken qysqy Olım­pıadada shańǵyshy Vladımır Smırnov, Atlantada boksshy Vasılıı Jırov pen klas­sıkalyq kúrestiń sheberi Iýrıı Melnıchenko atoı salǵanda da qýanǵanbyz. Alaıda bolmysy bek­zat­tyqtan jaralǵan Bek­zat­tyń jeńi­siniń dámi basqasha edi. Odan keıin Afınada al­mas qylyshtaı jarqyraǵan jıyrma bir jas­­taǵy Baqtııar Artaev abyroıymyzdy saq­­tap, jalǵyz altyndy ıelengende de kóz ushy­­na túıir tamshy tyǵyla bergen. «Bar bol, Baqtııar!» degenbiz jal­ǵyz altyndy qor­­­jyn­ǵa túsirgen baýyrymyzǵa rı­zashylyq keıippen.

Ol kezde qundylyq bas­­­­­qasha ma edi, álde azat­tyqtyń bastapqy jyldary bolǵandyqtan boıdaǵy rýh aspandap turýshy ma edi, kim bilsin?! Áıteýir Bekzat pen Baqtııardyń jeńisi el­di erekshe qýantqany este. Odan keıin de saıyp­qy­ran­darymyz tórtkúl dúnıeni ózine qaratqan kezder az bol­ǵan joq.

Alty qurlyq moıynda­ǵan Alty Alash ar­daq­ty­lary armandaǵan Kók Týy­myz kókte jel­birep, rýhty kó­teretin gımnimiz udaıy shyr­­­qalyp, Eltańbamyz ­el­di­gimizdi eseleı ber­sin!

Abylaıdyń aq týy men azat eldiń kók týynyń arasynda úsh ǵasyrlyq tarıh jatyr. Ol kezde Kók Týymyz dala maıdanynda, batyrlar attyń ústinde shapqan sátte jelbirese, búginde beıbit eldiń aspanynda jelbirep tur. Biz úshin aq tý da, kók tý da qymbat. О́ıtkeni jıyrma birden úshti alýǵa bolmaıdy.