Astana qalasynyń turǵyny Álisher Qudaıbergenov qala mańynan tabıǵatta óte sırek kezdesetin, «Qyzyl kitapqa» engizilgen sabanshy ustap aldy. Bul týraly Zakon.kz habarlady.
Eskerte keteıik, sabanshy dep jurt manýldy, ıaǵnı jabaıy mysyqty ataıdy.
Astananyń shetinde turatyn Álisher Qudaıbergenov óz úıine jaqyn ornalasqan ekpeli aǵashtardy jıi aralap turady eken. Ol ormanǵa sońǵy barǵanynda jyrtqyshtar tobyna jatatyn mysyq tuqymdas iri, salmaǵy 6 kılogramdaı sabanshyǵa tap keledi. Álisherdiń sońynan ergen ıtti kórgende álgi mysyq qasha jónelmeı, aıbat shegip, qarsy shabýyldaıtyndaı syńaı bildirgen. Sol kezde jigit saspaı, jiti qımyldap, ebin taba qolyndaǵy qabymen álgi jabaıy mysyqty tyrp etkizbeı ustap alady.
Álisherdiń «oljasyn» búkil kórshileri kórip, qyzyqtap, ony etpen qorektendiripti.
– Men bul sabanshyny úıimde asyraǵym kelgen, biraq onyń «Qyzyl kitapqa» engen jyrtqysh ekenin bilgendikten, júrgen jerine qaıtadan aparyp tastadym. Ony bosatyp jibergenimde, meniń janymnan uzaýǵa asyǵa qoımady, – deıdi Á.Qudaıbergenov.
Sabanshy – óte sırek kezdesetin jyrtqysh. Onyń jer betinde qanshasy qalǵany ázirge belgisiz. Sheteldik kóptegen ǵalymdar birneshe ret osy jabaıy mysyqty tabý maqsatynda Qazaqstan aýmaǵynda arnaıy ekspedısııa uıymdastyrǵan. Biraq ony kezdestire almapty.
Degenmen, keıingi jyldarda Qazaqstan aýmaǵynda dala tyshqandary kóbeıe túskendikten, sabanshylardyń da sany arta bastapty. О́ıtkeni, manýldyń negizgi qoregi – tyshqandar.
Joldybaı Bazar.
Derekkóz: Zakon.kz.
Foto: Bigmir.net.