ATYRAÝ. 21 sáýir. Budan buryn habarlanǵanyndaı, 19 sáýir kúni keshke Atyraý oblysynda №41 «Almaty-Atyraý» baǵytyndaǵy jolaýshylar poıyzy apatqa ushyraǵan edi. Bul týraly «Qazaqstan temir joly» UQ» AQ baspasóz qyzmetiniń dereginet silteme jasaǵan egemen.kz tilshisi habarlady.
Oqıǵa sol kúni keshkilik 17 saǵat 55 mınótte Qyzylqoǵa aýdanyndaǵy Janterek-Kenbaı temirjol beketteriniń aralyǵynda oryn alǵan. Sostav quramynda 19 vagon, onyń ishinde 16 jolaýshylar vagony bolǵan. Osy vagondarmen 586 jolaýshy jáne 26 jolserik Atyraýǵa baǵyt alǵan. Aldyn ala aıtqymyz kelgeni, 12 vagonnyń relsten shyǵyp ketkenine, sonyń ishinde 8 vagonnyń bir janyna qısaıyp qalǵanyna qaramastan, jolaýshylar arasynda adam shyǵyny bolmasa da, ár deńgeıdegi jaraqattar alǵandar bar.
Osynaý sýyt habar atyraýlyq qutqarýshylardy aıaǵynan tik turǵyzdy. О́ıtkeni, aldymen bárinen adam ómiri qymbat edi. Jolaýshylardy birinshi kezekte qutqarý qajet. Poıyz apaty jónindegi sýyt habardan soń oqıǵa ornyna qutqarý qyzmetiniń ókilderimen birge shuǵyl jetken oblys ákiminiń orynbasary Sálimjan Naqpaev tómendegi jaıttardy málim etti. Onyń aıtýynsha, jolaýshylardy qutqarýǵa tótenshe jaǵdaı mınıstrligine qarasty qurylymdarmen birge «Qaınarmunaıgaz», «Dossormunaıgaz», «Embimunaıenergo» jáne «Maqat» JО́B sekildi kásiporyndar jolaýshylardy Maqat aýdanynyń ortalyǵyna shuǵyl jetkizýdi uıymdastyrýǵa atsalysty. Oqıǵa ornynda 45 medısına qyzmetkeri bar 6 jedel járdem brıgadasy jumys jasady.
Sol kúni keshkilik 22 saǵat 30 mınótte eki tikushaqpen Atyraý qalasyna jedel jetkizilgen 8 adamnyń úsheýi aýrýhanaǵa jatqyzyldy. Oqıǵa ornynan 435 adam avtobýstarmen jáne vahtalyq kóliktermen Maqat stansasyna, al 169 adam oqıǵa ornynan 6-7 shaqyrymdaı qashyqtaǵy Kenbaı temirjol beketinen Maqatqa deıin poıyzben jetkizilgen. Al Maqat stansasynda apatqa ushyraǵan poıyz jolaýshylarǵa psıhologııalyq turǵydan qoldaý kórsetildi.
Maqat aýdandyq aýrýhanasyna jetkizilgen 26 jolaýshynyń altaýy ártúrli jaraqattarmen jatqyzyldy. Jeksenbige, ıaǵnı, 20 sáýirge túngi 01 saǵat 15 mınótte Maqat stansasynan 6 jolaýshy vagony bar arnaıy poıyz jasaqtaldy. Osy jolaýshy poıyzymen jolaýshylar 03 saǵat 10 mınótte Atyraý qalasyna jetkizildi. Jolaýshylardy meken-jaılaryna jetkizý úshin 10 avtobýs uıymdastyryldy. Medısınalyq jáne psıhologııalyq kómek berý úshin 5 jedel járdem brıgadasy, 4 psıholog kútip turdy.
«Almaty-Atyraý» poıyzynda bolǵan jolaýshylar arasynan aýrýhanaǵa túsken 10 adamnyń ekeýiniń jaǵdaıy aýyr», – degen Atyraý oblystyq densaýlyq saqtaý basqarmasynyń basshysy Meńdihan О́tepqalıevtyń aıtýyna qaraǵanda, qazirgi kezde oblystyq aýrýhanada apat saldarynan zardap shekken 6 adam jatyr. Aýyr jaraqat alǵandardyń biriniń jaǵy synǵan, beti tilingen. Al ekinshisiniń qabyrǵalary synǵan. Bularǵa qosa Maqat aýdandyq aýrýhanasynda tórt adam emdelýde.
Atyraý temir jol jelilik bóliminiń bas ınjeneri Jánibek Jónturbaevtyń aıtýynsha, apattyń saldaryn joıý jumystaryna «Qazaqstan temir joly» AQ-nan 218 adam, 22 birlik tehnıka, 8 elektr stansasy jáne 2 qalpyna keltirý poıyzy jumyldyrylǵan. Jeksenbide, naqtylaı aıtqanda, 20 cáýirde 05 saǵat 57 mınótte búlingen 325 metr temir jol bóligi qalpyna keltirilip, poıyzdar qozǵalysy qalpyna keldi. Aıtqandaı, emir joldaǵy apat saldary tolyq joıylǵansha, 9 jolaýshy, 34 júk poıyzynyń qozǵalysy shekteldi.
Mamandar jolaýshylar poıyzynyń apatqa ushyraýyna sebep bolar birneshe nusqa qarastyrylyp jatqanyn aıtady. Arnaıy qurylǵan komıssııa naqty ne sebep bolǵanyn bir aptadan soń jarııa etpek. Ázirge apattyń sebebi belgisiz, alaıda, mundaı apattan sabaq alý jaǵy tek arnaıy komıssııany ǵana emes, barshany, ıaǵnı, qarapaıym jolaýshydan temirjolshyǵa deıin, tipti, salalyq mınıstrliktegilerdi, tipti Úkimetti de oılantýy tıis.
Joldasbek Shópeǵul.
Derekkóz: egemen.kz.
Foto: Rahym Qoılybaev.