Prezıdent Qasym-Jomart Toqaevtyń Qazaqstan halqyna úndeýiniń tolyq mátini jarııalandy, dep habarlaıdy Egemen.kz.
Qurmetti otandastar!
Qazaqstan óte mańyzdy ári betburysty kezeńge qadam basqaly tur. 5 maýsym kúni azamattarymyz jalpyulttyq referendýmda daýys beredi. Konstıtýsııaǵa túzetýler engizý máselesi boıynsha sheshim qabyldaıdy. Bul – memlekettiń jáne búkil qoǵamnyń bolashaǵyn aıqyndaıtyn jaýapty sát. El taǵdyry eshkimdi beı-jaı qaldyrmaıtyny anyq.
Biz qazir barlyq salany jańǵyrtýǵa kiristik. Osy jolda memleketti basqarý úlgisin túbegeıli ózgertý qajettigi týyndady. Sol sebepti men naýryz aıyndaǵy Joldaýymda saıası jańǵyrýdyń aýqymdy baǵdarlamasyn usyndym. Onyń basty maqsaty – elimizdi odan ári demokratııalandyrý, halyqtyń memleketti basqarý isine qatysý múmkindigin keńeıtý. Sondaı-aq Úkimettiń tıimdiligin arttyrý. Bul ózgeristi tolyq júzege asyrsaq, yqpaldy parlamenti bar prezıdenttik respýblıka úlgisine birjola kóshemiz.
Konstıtýsııalyq reforma adam quqyqtary men bostandyqtaryn qorǵaý júıesin barynsha kúsheıtedi. Sonymen birge elimizdegi saıası básekeniń ádil jáne ashyq bolýyn qamtamasyz etedi.
Biz Ata zańymyzdyń otyzdan astam babyna ózgeris engizgeli otyrmyz. Onyń bári azamattarymyzdyń múddesine tolyq saı keledi. Osylaısha memleketimizdi túbegeıli jańǵyrtamyz. Sol arqyly Ekinshi Respýblıkanyń negizin qalaımyz.
Qurmetti otandastar!
Elimizdiń tarıhynda Konstıtýsııaǵa engiziletin ózgerister alǵash ret jalpyhalyqtyq referendým arqyly júzege asyrylady.
Referendým ótkizý – Qazaqstanda damyǵan demokratııalyq qoǵam qurý jolyndaǵy mańyzdy qadam.
Ata zańǵa engiziletin túzetýler jobasy elimizde bir aı boıy qyzý talqylandy. Túsindirý jumystary júrgizildi. Qoǵamda konstıtýsııalyq reformaǵa qatysty pikirler kóp aıtylyp jatyr. Onyń erejeleri Prezıdenttiń artyqshylyqtary men ókilettigin kúsheıtýge emes, bılik tarmaqtary arasyndaǵy úılesimdi jáne tepe-teńdik júıeni nyǵaıtýǵa, barlyq azamattyń múddesin, quqyǵy men erkindigin qorǵaýǵa baǵyttalǵan.
Búkil halyqtyń Konstıtýsııaǵa engiziletin ózgeristerge qatysty erikti tańdaýy Jańa, Ádiletti Qazaqstannyń berik irgetasyn qalaıdy. Biz birlese otyryp, shyn máninde, Jańa Qazaqstan quramyz. Onda áleýmettik ádildik jańa qoǵamdyq kelisimniń basty qundylyǵy jáne negizgi ózegi bolady.
Referendým qoǵamymyzdyń azamattyq kemeldigi men saıası sanalylyǵyn baǵalaýǵa múmkindik beredi. Referendýmnyń ortalyq komıssııasy men basqa da ýákiletti memlekettik organdar saılaý zańnamasyndaǵy barlyq normanyń múltiksiz saqtalýyn qamtamasyz etedi. Daýys berý barysyn halyqaralyq baqylaýshylar men elimizdegi qoǵamdyq birlestikterdiń ókilderi qadaǵalaıdy.
Saılaý ýchaskesindegi sizdiń daýysyńyz qoǵamdyq ómirdiń ádil ári túsinikti jańa erejelerin aıqyndaýda mańyzdy jáne sheshýshi ról atqarýy múmkin. Siz saılaý ýchaskesine kelý arqyly halqymyzdyń birligi men yntymaǵy myǵym ekenin kórsetesiz.
Buryn-sońdy bolmaǵan qubylmaly geostrategııalyq jaǵdaıda jáne elimizdiń aldynda turǵan kúrdeli mindetterdi oryndaý úshin bizdiń birligimiz bekem, yntymaǵymyz berik bolýǵa tıis. Shynaıy demokratııa árbir azamattyń ortaq iske belsendi ári sanaly túrde qatysýyn bildiredi. Siz jańa túzetýlerge daýys bere otyryp, jemqorlyqqa, tamyr-tanystyqqa, saıasat pen ekonomıkadaǵy monopolııaǵa batyl qarsy shyǵasyz.
Qurmetti otandastar, sizderdi tarıhı tańdaý jasaýǵa shaqyramyn. О́ıtkeni, bul Qazaqstannyń damý baǵdaryn aıqyndaıdy. Árqaısyńyz birtutas Qazaqstan halqynyń ajyramas bólshegisiz jáne tutas ulttyń bolashaǵyna yqpal ete alasyz. Demek, bul – óz taǵdyryńyz degen sóz. Otanymyzdyń taǵdyry sizderge baılanysty.
Aldaǵy referendým memleketimizdi nyǵaıtýǵa jáne qoǵamdy tyń serpinmen damytýǵa jol ashady. Men árbir azamatymyzdy el taǵdyryn aıqyndaıtyn tarıhı tańdaý jasaýǵa shaqyramyn. Bul referendýmda ár azamattyń daýysy – mańyzdy. Árbir azamat tutas ulttyń taǵdyryna, ıaǵnı tikeleı óz taǵdyryna oń yqpal ete alady.
Endeshe, 5 maýsym kúni óz tańdaýymyzdy jasaıyq!
Jańa Qazaqstandy bárimiz birge quraıyq!