Oblys turǵyndary tań atysymen Ata Zańǵa ózgerister men tolyqtyrýlar engizý jónindegi jalpyulttyq referendým ótkizý boıynsha uıymdastyrylǵan óńirdegi 718 ýchaskege aǵylyp kele bastady dep habarlaıdy Egemen.kz
Oblystyq aýmaqtyq referendým komıssııasynyń tóraǵasy Manarbek Sadýovtyń baıandaýyna qaraǵanda, saǵat kúndizgi 10-ǵa deıin asa mańyzdy saıası is-sharaǵa ún qosyp, óz qalaýyn jasaıtyn 507 447 adamnyń 135 151-i daýys berip úlgergen. Oblys ortalyǵyndaǵy №1 orta mektepte uıymdastyrylǵan №8 saılaý ýchaskesine 1461 adam tirkelgen eken. Alǵashqy lekpen 100-den astam adam óz tańdaýyn jasap, daýys berip úlgerdi. Saılaý ýchaskesiniń tóraıymy Sandýǵash Nurqanovanyń aıtýyna qaraǵanda, belsendilik joǵary.
Oblys ákimi Ermek Marjyqpaev ta osy saılaý ýchaskesinde óz tańdaýyn jasady. О́ńir basshysynyń aıtýyna qaraǵanda, mańyzdy saıası naýqan jaýapkershilikpen uıymdastyrylýda. Osy jerde Botagóz jáne Rýstam Ahmetovterdiń otbasyn kezdestirdik. Eki bala tárbıelep otyrǵan jas otbasy bolashaǵynyń baıandy, urpaǵynyń baqytty bolaryna nyq senimdi. Sol úshin de óz tańdaýymyzdy jasap, daýys berdik deıdi olar.
Atalmysh saılaý ýchaskesinde múmkindigi shekteýli adamdardyń da ýaqytyly daýys berýi qamtamasyz etilýde. Ýchaskedegi saılaý komıssııasy músheleriniń aıtýyna qaraǵanda, daýys berýshilerdiń deni endi kele bastamaq.