«Almatyda 574 saılaý ýchaskesi tańǵy saǵat 07.00-den bastap jumysyn bastap ketti», dep jazady Egemen.kz.
Almatylyqtardyń saılaý ýchaskesine kelip, azamattyq quqyqtaryn paıdalanýǵa barlyq jaǵdaı jasalǵan. Erekshe qajettilikteri bar tulǵalarǵa pandýs ta ornatylyp, tıesili orynǵa kele almaıtyn turǵyndar bıýlletenge óz úılerinde qol qoıa alady. Arnaıy kaskadtyq kýrstan ótken mamandar turǵyndar tarapynan týyndaıtyn kez-kelgen suraqqa jaýap berýge daıyn.
Almaty qalalyq aýmaqtyq saılaý komıssııasynyń tóraıymy Janna Asanova qalada 1 mıllıon 100 myńnan astam adam referendýmda daýys berýge quqyly ekenin aıtty. Brıfıngte spıker qaladaǵy saılaý ýchaskeleri tańǵy 6-dan keshki 20.00-ge deıin jumys isteıtinin habarlady.
«Eshqandaı óreskel zań buzýshylyqtar bolǵan joq. Barlyǵy jumys tártibinde. Bizdiń tizimde saılaý quqyǵy bar 1 126 854 azamat bar. Keshe saǵat 18:00-ge deıin 1388 syrttaı daýys berý bıýlletenderi shyǵaryldy. Qazir belsendilik birtindep kúsheıip keledi. Tańerteńgi saǵat 7-de bizde alǵashqy saılaýshylar boldy», dedi spıker brıfıngte.
№ 359 referendým komıssııasynyń tóraǵasy Aıymgúl Imanǵalıevanyń aıtýynsha, saılaýshylarǵa barlyq jaǵdaı jasalǵan. Tórt baqylaýshy jumys istep, barlyq saılaý normalary qatań saqtalýda. Referendýmǵa 10 kún qalǵanda azamattardyń uıaly telefonyna daýys beretin jerdiń mekenjaıy mobıldi qosymshalar arqyly aqparat jiberildi. Qala turǵyndaryna yńǵaıly bolý úshin qosymshalar kartalarynda jeke tulǵanyń daýys beretin ýchaskeniń ornalasqan jerin anyqtaý múmkindigi paıda boldy. Daýys berý ýchaskesin izdeýdiń negizgi sózderi: «Saılaý ýchaskeleri», «Referendým ýchaskesi», «Referendum precinct».
Referendýmda daýys berý úshin qala boıynsha azamattardy 574 saılaý ýchaskesi qabyldaıdy. Onyń 67-si aýrýhana men áskerı oryndar syndy arnaıy mekemeler bolsa, qalǵan 507-si ashyq formattaǵy mekenjaılar.