Aqtóbe oblysynda 517 saılaý ýchaskesi bolsa, óńirde daýys berý quqyǵy bar 560 myń adam tirkelgen. El Konstıtýsııasyna engiziletin ózgerister boıynsha ótkizilip jatqan jalpyhalyqtyq referendýmda aqtóbelikter belsendilik tanytýda, dep habarlaıdy Egemen.kz.
Saılaý ýchaskelerine kelgenderdiń sany jaǵynan Aqtóbe qalasy kósh bastap tur. Búginde oblys ortalyǵynda 162 saılaý ýchaskesi tirkelgen.
Aqtóbe qalasyndaǵy 11 yqshamaýdanda ornalasqan №110 ýchaskelik saılaý komıssııasy tańǵy saǵat 7.00-den bastap jumysyn bastady. Osy ýchaskede 1920 adam tirkelgen. Tańerteńgilik saǵat 09.30-ǵa deıin 327 turǵyn daýys berip ketti. Baıqaǵanymyz, osy aýmaqta zeınetkerler men orta jastaǵy turǵyndar óte belsendilik tanytyp jatyr. №110 ýchaskelik saılaý komıssııasynyń tóraǵasy Sáýle Myrzaǵulovanyń aıtýynsha, saılaý komıssııasy jumysyn bastalardan eki kún buryn saılaýshylar referendým týraly komıssııa múshelerinen surap ketipti.
Osy ýchaskede tórt baıqaýshy otyr. Solardyń biri Aqtóbe oblysy aýla klýbtary birlestiginiń jetekshisi – Aıgúl Orazbaǵanbetova. Baqylaýshy saılaý ýchaskesiniń tańǵy saǵat 7.00-de ashylǵanyn, eń aldymen bir áıel adam kelip daýys berip ketkenin aıtady. Túske taman adam qarasy kóbeıgen. Baıqaýshylar osy kezge deıin eshqandaı zań buzýshylyqtyń baıqalmaǵanyn, barlyǵy da óz retimen ótip jatqanyn habarlady.