Saılaýshylardyń kóńil kúıi joǵary. Sebebi halyq bul referendýmnan keıin eldegi áleýmettik-ekonomıkalyq ahýal jaqsaryp, damıtynyna úmitpen qaraıdy. Mundaı pikirdi konstıtýsııalyq referendýmnyń ótý barysyn baqylaýǵa kelgen TMD Parlamentaralyq Assambleıasynyń baıqaýshylary jetkizdi, dep jazady Egemen.kz.
«Álbette, referendým barysynda saılaýshylardan qolǵa alynǵan ózgeristerge qalaı qaraıtyndary surap bilgen edik. Kópshiligi eldiń turaqty damýyn qalaıtyndaryn aıtty. О́ıtkeni, keler urpaq óz bolashaqtaryn Qazaqstanmen baılanystyrsa eken degen tilekterin bildirdi. Sózsiz, adamdardyń qolaıly ómir súrý úshin birinshi kezekti áleýmettik-ekonomıkalyq jaǵdaıdy jaqsartý qajet. Parlamentte, sondaı-aq Ortalyq Saılaý komıssııasynda kezdesýler ótkizilip, bizdiń delegasııa Konstıtýsııadaǵy ózgeristerdi daıyndaǵan mamandarmen pikir almasýǵa múmkindik aldy. Budan túıgenimiz, memleket jyldyń basynda oryn alǵan qasiretti oqıǵalardy boldyrmaýǵa qam- qareket jasap otyr.
Prezıdent Qasym-Jomart Toqaev óziniń búgingi suhbattarynda da bul referendýmdy ótkizýdegi basty maqsat – eldiń ornyqty damýyn qamtamasyz etý ekenin basa aıtqan edi. El bıliginiń halyqtyń órkendeýine qajetti bastamalardy der kezinde kótere bilýi qýantarlyq jaǵdaı. Onyń aıǵaǵy búgingi konstıtýsııalyq referendým dep aıtýǵa negiz bar. Taǵy da bir aıta keterligi, bul aýqymdy ózgeristi ótkizbes buryn Parlament depýtattary jáne qoǵam ókilderi eldiń óńirlerinde bolyp, halyqpen túsindirý jumystaryn júrgizip, olardyń usynys-tilekterin qanyqqany qýantady árıne. Onyń nátıjesinde halyq naqty qalaıtyn ózgeristerdi taldap, anyqtaýǵa jol ashyldy», dedi TMD Parlamentaralyq Assambleıasy, Reseı Federasııasy Federaldyq Jınalysy Federasııa Keńesiniń Konstıtýsııalyq zańnama jáne memlekettik qurylys jónindegi komıtetiniń múshesi Oleg Sepkın.