Memleket basshysy Qasym-Jomart Toqaev bıylǵy jyldy «Balalar jyly» dep jarııalap, balalardyń bolashaǵyn qalyptastyrý maqsatynda naqty mindet júktegen bolatyn. Prezıdent tapsyrmasyna oraı, Taraz qalasynda «Baqytty bolashaq» oqýshylar saraıy paıdalanýǵa berildi. Jańa nysannyń saltanatty ashylý rásimine jınalǵan kópshilik áýeli ǵımaratty aralap kórdi. Sondaı-aq oqýshylardyń ǵylymı-zertteý jáne shyǵarmashylyq jumystary boıynsha uıymdastyrylǵan kórmeni tamashalady.
Jıynǵa Jambyl oblysynyń ákimi Nurjan Nurjigitov qatysyp, búginde oblysta kórkemóner, mýzykalyq, ǵylymı-tehnıkalyq, áskerı-patrıottyq baǵyttaǵy qosymsha bilim beretin 75-ten astam mektepten tys uıym ashylǵanyn atap ótti.
«Memleket basshysy 2022 jyldy «Balalar jyly» dep jarııalady. О́skeleń urpaqtyń balalyq shaǵynyń qamsyz, baqytty ótýin qamtamasyz etý – bizdiń ortaq mindetimiz. Búgingi tańda Jambyl oblysynyń balabaqshalarynda 57 myńnan astam bala tárbıelenýde. 244 myń bala mektepterde, 23 myń stýdent kolledjderde bilim alýda. Bilim berý sapasyn arttyrý máselelerimen qatar, balalardyń bos ýaqytyn uıymdastyrý da nazardan tys qalǵan emes. Jańa oqýshylar saraıynda jas urpaqtyń shyǵarmashylyq jáne zııatkerlik áleýetin damytý úshin barlyq jaǵdaı jasalǵan. El Prezıdenti atap ótkendeı, balalardyń ál-aýqaty – memleketimizdiń tabysty bolashaǵynyń senimdi kepili», dedi Nurjan Nurjigitov.
Al elimizdiń Bilim jáne ǵylym mınıstriniń keńesshisi, balalarǵa qosymsha bilim berýdiń respýblıkalyq oqý-ádistemelik ortalyǵynyń dırektory Raısa Sher jańa oqýshylar saraıy balalar úshin de, pedagogter úshin de ınnovasııalyq alańǵa aınalatynyn jetkizdi.
«Qazirgi ýaqytta elimizde barlyǵy 1 523 mektepten tys uıym jumys isteıdi. Bul óte jaqsy kórsetkish. Oqýshylardyń kásibı daıarlyqqa deıingi tyńǵylyqty daıyndyǵyn uıymdastyrý úshin kúsh-jigerimizdi biriktirý – asa mańyzdy. Jastar bolashaq mamandyǵyn senimdi túrde tańdap, kreatıvti, belsendi azamattyq ustanym ıesi bolýy tıis», dedi Raısa Sher.
Sondaı-aq Qazaqstannyń eńbek sińirgen qaıratkeri Jámıla Serkebaeva, Reseıdiń Chelıabi qalasynan kelgen «Kvantorıým» tehnoparkiniń basshysy Ivan Shmıdt, «R4 Technology & Research Center» bilim berý jáne zertteýler ortalyǵynyń dırektory Aıdyn Túsipjanov, Lakeview school Almaty dırektory Gúlnar Qaramendınova, Taraz servıs jáne tehnologııa kolledjiniń túlegi Baǵlan Jaqsybekov jáne Jambyl polıtehnıkalyq joǵary kolledjiniń 3-kýrs stýdenti Azamat Námelbek sóz sóılep, pedagogter men oqýshylarǵa tabys tiledi.
Oqýshylar saraıynyń ashylýyna oraı mektepten tys uıymdardyń beıini boıynsha pedagogter men mamandarǵa arnalǵan «Qosymsha bilim berýdegi ınnovasııalar: ıdeıadan bastap iske asyrýǵa deıin» taqyrybynda respýblıkalyq qurylymdyq dıalogy ótti. Qatysýshylar pikir almasyp, oı bólisti. Jalpy, «Baqytty bolashaq» oqýshylar saraıynda robottehnıka, 3D-modeldeý, avıamodeldeý, keme modeldeý, qazaq jáne qazirgi zamanǵy sándik-qoldanbaly óner, landshaftyq dızaın kabınetteri men sáýlet jáne dızaın mektebi, kovorkıng ortalyǵy bar. Sonymen qatar munda barlyǵy 81 úıirme jumys isteıtin bolady.
Jambyl oblysy