Fýtboldan Qazaqstan quramasy ekinshi jyl qatarynan Ulttar lıgasyndaǵy alǵashqy oıynyn jeńispen bastady. Jerlesterimiz 2020/2021 jylǵy dodanyń tusaýkeser kezdesýinde syrt alańda Latvııany 2:0 esebimen jeńgen bolsa, ótken aptada jalaýy jelbiregen atalǵan týrnırdiń úshinshi maýsymyndaǵy alǵashqy matchta Ázerbaıjan quramasyn da dál osyndaı eseppen tize búktirdi. Bul – jýyrda ǵana ulttyq qurama tizginin ustaǵan jattyqtyrýshy Magomed Adıevtiń bas komandadaǵy alǵashqy matchy boldy.
Osydan birer aı buryn M.Adıev ulttyq quramaǵa bas bapker bolyp taǵaıyndalǵannan keıin jankúıerler sheteldik mamannan asa úlken ózgeris, jańashyl fýtbol kútken bolatyn. Alaıda Adıevtiń negizgi komandadaǵy alǵashqy oıyny kóptiń kóńilinen shyǵa qoımasa da, bapker bastysy nátıje kórsetti. О́tken oıynda da, aldaǵy matchtarda da ulttyq quramaǵa tájirıbeli oıynshylardyń kómektese almaıtyny belgili. Sol fýtbolshylardyń joq bolýyna baılanysty Adıev bul joly jastarǵa jáne ulttyq qurama qataryna birazdan beri shaqyrtý ala almaı júrgen fýtbolshylarǵa múmkindik berdi. Atap aıtar bolsaq, Eldos Ahmetov, Baýyrjan Baıtana, Ramazan Orazov, Maksım Samorodov, Arman Keńesov, Bekhan Shaızada sekildi fýtbolshylar negizgi komandaǵa qaıta oralsa, Elhan Astanov, Abylaıhan Jumabek jáne Mıhaıl Gabyshevtar alǵash ret ulttyq quramaǵa shaqyrtý aldy. Debıýtanttar arasynan Ázerbaıjanmen ótken oıynda tek Elhan Astanov qana birinshi mınýttan bastap jasyl alańǵa shyǵyp, jaqsy oıynymen jankúıerlerdiń de, fýtbol mamandarynyń da kózine tústi. Sondaı-aq ekinshi taımda alańǵa tyńnan qosylǵan Ramazan Orazov ta ulttyq quramanyń oıynyna qan júgirtip, óz sheberliginiń arqasynda quramanyń jeńiske jetýine súbeli úlesin qosty.
Al Ázerbaıjan quramasynyń bas bapkeri Djannı De Bıazı bolsa alańǵa kil myqty ári tájirıbeli oıynshylaryn shyǵardy. Sonyń arqasynda da qonaq komanda birinshi kezeńde ústemdikke kóp ıe boldy. Qarsylastar birinshi taımda Igor Shaskıı qorǵaǵan qaqpaǵa 11 soqqy jasady. Onyń altaýyn qaqpaǵa dál baǵyttady. Ásirese birinshi kezeńniń sońyna qaraı qonaqtar óte belsendi boldy. Aldymen 30-mınýtta Renat Dadashev qaptaldan tepken edi. Ony bizdiń qaqpashy qaıtaryp aldy. Keıin 36-mınýtta Azar Salalhı soqqy jasaǵan bolatyn. Abyroı bolǵanda dop Ázerbaıjan oıynshysyna tıip, qaqpadan qıys ketti. Jasyratyny joq, oıynnyń alǵashqy 45 mınýtyn Qazaqstan ulttyq quramasy óte nashar ótkizdi. Tipti qarsylastar qaqpasyna birde-bir soqqy jasaı almady. Muny matchtan keıin bas bapkerdiń ózi de moıyndady: «Oıynnyń basy biz úshin jaman bolǵan joq. Biz dopqa kóp ıelik etip, oıyndy óz baqylaýymyzda ustadyq. Biraq 25-mınýttan keıin kóp qatelesip, konsentrasııany joǵaltyp aldyq. Nátıjesinde, qarsylasymyz qaýipti shabýyl jasap, oıyn tizginin óz qoldaryna aldy».
Ekinshi taımda M.Adıev Baýyrjan Baıtananyń ornyna jas fýtbolshy Ramazan Orazovty alańǵa shyǵaryp, taktıkalyq ózgeris jasady. Nátıje de kóp kúttirgen joq. Alań ortasynda óte belsendi oınaǵan bizdiń jigitter 50-mınýtta esepti ashty. Abat Aıymbetovtiń qarsylastyń aıyp alańyna jaqyn jerden qaqpaǵa qaqyrata tepken doby aldymen qorǵaýshyǵa, keıin baǵytyn ózgertip mańdaıshaǵa tıip, qaqpa torynan tabyldy. Arada birer mınýt ótkende Ramazan Orazov ta óz múmkindigin tıimdi paıdalanyp, quramanyń ekinshi golyn soqqan edi. Alaıda VAR kómegine júgingen tóreshi beıneqaıtalaýdan keıin Orazov oıynnan tys qaldy dep, onyń golyn eseptemeı qoıdy.
Degenmen shabýylyn odan saıyn údetken jerlesterimiz Ázerbaıjan qaqpasyna báribir ekinshi golyn soqty. 58-mınýtta Abat Aıymbetov aıyp alańyna asyrylǵan dopqa birinshi jetti de, esepti eseledi. Bul sátte de tóreshi beıneqaıtalaýǵa júgindi. Uzaq ýaqyt talqylaýdan soń tóreshi shabýylshymyzdyń golyn esepke aldy – 2:0. Match sońyna deıin qarsylastar bizdiń fýtbolshylardy qyspaqqa alyp, esep aıyrmasyn qysqartýǵa tyrysqanymen, onysynan túk shyqpady. Tóreshiniń sońǵy ysqyryǵyna deıin tablodaǵy kórsetkish ózgerissiz qaldy. Osylaısha, Qazaqstan quramasy Ulttar lıgasyndaǵy alǵashqy oıynyn jeńispen bastady.
Al bizdiń toptaǵy ekinshi oıynda Slovakııa syrt alańda Belarýs quramasynan basym tústi – 1:0. Serbııadaǵy beıtarap alańda ótken kezdesýdegi jalǵyz goldy 50-mınýtta 19 jastaǵy Tomash Sýslov soqty. Ázerbaıjan qaqpasyna eki gol salǵan jerlesterimiz dop aıyrmasy boıynsha «S» lıgasynyń tórtinshi tobynda kósh bastady. Jerlesterimiz búgin Ulttar lıgasynyń ekinshi týr aıasynda syrt alańda Slovakııa quramasymen kezdesedi. Match Trnava qalasyndaǵy «Sıtı Arena» stadıonynda elorda ýaqytymen 00:45-te bastalady. О́kinishke qaraı, bul oıynǵa jaraqatyna baılanysty komanda kapıtany Ashat Taǵybergen qatysa almaıtyn boldy.