Sońǵy jyldary Ekibastuz qalasynda turǵyn úı qurylysy qarqyndy júrgizilýde. Máselen, eki jarym jyl ishinde kórsetkish 22 myń sharshy metrden 66 myń sharshy metrge artyp otyr. Sáıkesinshe, baspana baqytyn sezingenderdiń qatary kóbeıýde.
Jaqynda kezekti 72 otbasy qonys toıyn toılady. Onyń 18-i kópbalaly otbasylarǵa úlestirilse, qalǵany jetim balalarǵa, áleýmettik osal toptyń múshelerine berildi.
Baspanaǵa ıe bolǵan turǵyndardyń biri – Láılá Áshirbekova. Ol 14 jastaǵy múmkindigi shekteýli qyzyn jalǵyz ózi tárbıelep otyr. 14 jyl boıy páter jaldap kelgen.
«Buǵan deıin uzaq jyldar boıy páter jaldap turdym. Baspanaǵa qol jetkizip otyrǵanyma qatty qýanyshtymyn. Osy sátti asyǵa kúttik. Qıyn kúnderdiń barlyǵy artta qaldy dep úmittenemin. Memleket tarapynan zor qoldaý kórsetilgenine rızamyn. Men óte baqyttymyn», deıdi Láılá Áshirbekova qýanyshy qoınyna syımaı.
Atalǵan úı «Nurly jer» memlekettik baǵdarlamasy sheńberinde salynǵan. Jalpy, sońǵy eki jarym jylda atalǵan baǵdarlama boıynsha 1 359 páter úlestirildi. Sonyń esebinen 5 500-den astam adam tizilgen úı kezegi 11 paıyzǵa qysqarǵan.
Pavlodar oblysy,
Ekibastuz qalasy