Eldegi saıası partııalar referendým qorytyndysy boıynsha málimdeme jasady, dep habarlaıdy Egemen.kz.
«Aq jol» demokratııalyq partııasy Respýblıka Konstıtýsııasyna ózgertýler engizý boıynsha ótken referendým ashyq ári demokratııalyq úrdisterdiń saqtalýymen ótti dep esepteıdi.
«Referendým barysynda ýchaskelerdi baqylaǵan «Aq jol» dempartııasynyń ókilderi saılaý zańnamasynyń qatań buzylýyn tirkemedi. Tek daýys berý nátıjesine áser etpeıtin tehnıkalyq aqaýlar men saılaýshylar tizimindegi jekelegen sáıkessizdikter baıqaldy. Referendým qorytyndysy talassyz ári Qazaqstan halqynyń myqty Prezıdent, yqpaldy Parlament pen esep beretin Úkimeti bar memleketti basqaraýdyń jańa modelin qurý baǵytyn qoldaıtynyn aıǵaqtaıdy», dep málimdedi partııa kóshbasshysy Azat Perýashev.
«Aýyl» partııasynyń tóraǵasy Álı Bektaevtyń málimdeýinshe, referendým taǵaıyndalǵan alǵashqy kúnnen bastap partııa músheleri Prezıdenttiń bastamalaryna qoldaý bildirip, Konstıtýsııalyq ózgeristerdiń mazmunyn talqylaý isine belsene aralasqan.
«Biz úshin damýdyń jalǵyz ǵana joly bar. Ol – demokratııalyq jol. Tek demokratııalyq júıede ǵana qoǵamnyń árbir múshesi memlekettik saıasatty qalyptastyrýda teń quqyqqa ıe bolady. Keshegi referendým arqyly barsha Qazaqstan halqy osy joldy tańdady dep bilemin», dedi «Aýyl» halyqtyq-demokratııalyq patrıottyq partııasynyń músheleri.
Referendým qarsańyndaǵy úgit-nasıhat jumystaryn júrgizýge Qazaqstan Halyq partııasy da belsene aralasty. Partııa atynan málimdeme jasaǵan saıası uıymnyń jańa tóraǵasy Ermuhamet Ertisbaev: «Biz nátıjege rızamyz jáne bul – barlyq qazaqstandyqtardyń jeńisi dep sanaımyz! Qazaqstandyqtar is júzinde Prezıdent Qasym-Jomart Toqaevqa zor senim bildirdi», deıdi. Qazaqstan Halyq partııasy referendýmnan keıin qazaqstandyqtardyń aldynda turǵan basty mindet – Konstıtýsııanyń qabyldanǵan normasyn zańnamalyq jáne tájirıbelik turǵyda iske asyrý dep esepteıdi.
«Barlyq memlekettik kompanııalardy, birinshi kezekte «Samuryq-Qazyna» qoryn sheneýnikterdiń qolynan tikeleı jáne dereý halyqtyń menshigine berý qajet. Biz, Qazaqstan Halyq partııasy «Jer jáne jer qoınaýy halyqqa tıesili» degen Konstıtýsııalyq normany iske asyrý jónindegi halyq zańyn jarııa túrde ázirleýdiń bastalǵanyn málimdeımiz», dep jazylǵan partııanyń buqaralyq aqparat quraldaryna taratqan málimdemesinde.