Qyrǵyzstan Prezıdenti Sadyr Japarov Qasym-Jomart Toqaevty jalpyhalyqtyq referendýmnyń sátti ótýimen quttyqtap, damýdyń jańa kezeńine qadam basqan Qazaqstanǵa jyly lebizin bildirdi, dep habarlaıdy Egemen.kz Aqordaǵa silteme jasap.
Qasym-Jomart Toqaev Sadyr Japarovqa quttyqtaǵany úshin jáne Qyrǵyzstan baqylaýshylarynyń referendýmǵa belsendi qatysqanyna rızashylyǵyn bildirdi.
Memleket basshysy Jańa Qazaqstandy qurý úderisinde baýyrlas Qyrǵyzstanmen aradaǵy yntymaqtastyqty odan ári nyǵaıtýǵa erekshe kóńil bólinetinin aıtty.
Taraptar jaqynda Bishkekte ótken kelissózderdiń nátıjesi qazaq-qyrǵyz qarym-qatynastarynyń joǵary deńgeıin naqtylaǵanyn jáne eki el arasyndaǵy strategııalyq seriktestiktiń kókjıegin keńeıte túskenin atap ótti. Qazirgi ýaqytta Qazaqstan men Qyrǵyzstan úkimetteri saıası, saýda-ekonomıkalyq jáne mádenı-gýmanıtarlyq salalarda qol jetkizilgen ýaǵdalastyqtardy júzege asyrý jumystaryn júrgizip jatyr.