«Aq jol» Qazaqstan demokratııalyq partııasynyń tóraǵasy Azat Perýashev BAQ ókilderine arnalǵan brıfıngte Konstıtýsııaǵa tolyqtyrýlar men túzetýler engizý jónindegi jalpyulttyq referendýmnyń nátıjeleri boıynsha málimdeme jasady.
Partııa tóraǵasy Konstıtýsııaǵa ózgertýler engizý boıynsha ótken referendýmnyń ashyq ári demokratııalyq úrdisterdiń saqtalýymen ótkenin aıtty. Saılaýshylardyń kelýi, daýys berý nátıjesi azamattardyń naqty tańdaý quqyǵyn, sonyń ishinde, ózge pikirde qalý quqyǵyn kórsetedi, dep sanaıdy Azat Perýashev.
«Referendým ózara syılastyq pen saıası pikirtalasta sabyrlyqty saqtaı otyryp, azamattarymyzdyń ózge pikirlermen sanasýy sekildi qoǵamnyń jańa saıası mádenıetin aıqyndap berdi. Referendým barysynda ýchaskelerdi baqylaǵan «Aq jol» demokratııalyq partııasynyń ókilderi saılaý zańnamasynyń qatań buzylýyn tirkemedi. Tek daýys berý nátıjesine áser etpeıtin tehnıkalyq aqaýlar men saılaýshylar tizimindegi birqatar sáıkessizdik baıqaldy. Referendým qorytyndysy talassyz bolyp tabylady jáne Qazaqstan halqynyń myqty prezıdent, yqpaldy parlament pen esep beretin úkimeti bar memleketti basqarýdyń jańa modelin qurý baǵytyn qoldaıtynyn aıǵaqtaıdy», dedi partııa tóraǵasy.
Sondaı-aq ol: «Referendým, sondaı-aq, Prezıdent Q.Toqaevqa jáne ádil memleket pen Jańa Qazaqstan qurý jolyndaǵy mıllıondaǵan qazaqstandyq úmit artyp otyrǵan bastamalaryna degen qoǵam seniminiń joǵary deńgeıin kórsetti. Biraq 5 maýsymda Qazaqstan halqy jol ashqan múmkindikterdiń is júzinde júzege asýy árqaısymyzǵa tikeleı baılanysty. Barlyq azamattardy, kásipkerler men sheneýnikterdi, jastar men zeınetkerlerdi, jumysshylar men sharýagerlerdi, túrli ulttar men din ókilderin – shyn máninde Jańa, Ádiletti Qazaqstan qurýǵa shaqyramyz», dedi halyqqa arnaǵan málimdemesinde.