Balalar jylyna oraı Qyzylordada ótkizilip jatqan is-sharalarǵa «Daryn» oblystyq qosymsha bilim berý ortalyǵy kóp úles qosyp otyr. Ortalyq mamandary sońǵy aptanyń ózinde ataýly jyl aıasynda mektepke deıingi bilim berý uıymdarynyń tárbıelenýshileri arasynda «Baqytty balalyq shaq» taqyrybynda oblystyq beınerolık baıqaýyn, «Maǵjan oqýlary» ǵylymı-shyǵarmashylyq saıysyn, «Juldyzaı-2022» Ulttyq ınklıýzıvti oıyndarynyń oblystyq kezeńi men «Qabilet balalar kózimen» taqyrybynda ótkizilgen respýblıkalyq baıqaýdy sátti ótkizdi.
«Baqytty balalyq shaq» taqyrybyndaǵy beınerolık baıqaýy onlaın formatta ótkizilip, oqýshylardyń shyǵarmashylyǵyn qalyptastyrý arqyly bos ýaqytyn tıimdi paıdalanýǵa beıimdeýdi maqsat etken saıysqa 18 baldyrǵan qatysty. Bala boıyna estetıkalyq qabilet darytýdy kózdegen baıqaý qorytyndysy boıynsha 10 bóbekjaı-baqsha tárbıelenýshileri jeńimpaz atanyp, oblystyq bilim basqarmasynyń alǵys hattary men baǵaly syılyqtarymen marapattaldy.
– Ult ádebıetin baıytqan Maǵjan Jumabaev shyǵarmashylyǵy qazaqtyń sarqylmas qazynasy. Jyldaǵy dástúrge oblystyq bilim basqarmasynyń qoldaýymen oqýshylar arasynda ótkizilgen saıysta aqynnyń óleńderi oqylyp, solaqaı saıasat qurbany bolǵan qalamgerdiń rýhyna qurmet kórsetildi, – deıdi oblystyq «Daryn» qosymsha bilim berý ortalyǵy dırektorynyń orynbasary Kúljahan Saǵyndyqqyzy.
Jalpy, bilim berý uıymdaryndaǵy 7-11-synyp oqýshylary arasynda ótken «Maǵjan oqýlary» ǵylymı-shyǵarmashylyq baıqaýyna qala men aýdandardan 30-dan astam oqýshy qatysyp, az ǵumyrynda ulty úshin ulan-ǵaıyr is bitirip ketken sóz zergeriniń shyǵarmashylyǵyn nasıhattaýǵa úles qosty. Saıys qorytyndysymen jeńimpaz atanǵan 14 oqýshy marapattaldy.
Osy is-sharalarmen qatar ortalyq oblystyq bilim basqarmasy men oblystyq dene shynyqtyrý jáne sport basqarmasynyń qoldaýymen «Nursát» tennıs ortalyǵynda erekshe qajettilikteri men damý múmkindikteri bar balalar arasynda «Juldyzaı-2022» ulttyq ınklıýzıvti oıyndardyń oblystyq kezeńin uıymdastyrdy. Balalar jylyna oraı ótken saıysta oqýshylar golbol, ústel tennısi, asyq atý, bestas, mını-fýtbol, para-karate jáne jeńil atletıka sport túrlerinen saıysty.
Dástúrli spartakıadanyń oblystyq kezeńine qala men aýdandardan jáne arnaýly mektep-ınternattardan 67 oqýshy qatysyp, jeńimpaz atanǵan 36 qatysýshy jeńis tuǵyrynan kórindi. Jalpy, ulttyq ınklıýzıvti oıyndardyń damý múmkindikteri shekteýli balalardy sportqa tartý men olardy áleýmettendirýdegi mańyzy erekshe. Osy saıys jeńimpazdary alda ótetin respýblıkalyq kezeńge joldama alyp, aımaq abyroıyn qorǵaıdy.
Oblysta «Qabilet balalar kózimen» taqyrybyna ótkizilgen respýblıkalyq baıqaý da sátti uıymdastyryldy. Oǵan «Qabilet» jobasynyń 10-11 jastaǵy 18 oqýshysy qatysyp, baqtaryn synady.
Shyǵarmashyl, ónerli de talantty jastardy anyqtap, qoldaýǵa arnalǵan saıysta Qazaly aýdany №92 mekteptiń 4-synyp oqýshysy Álınur Tolybaı, Qyzylorda qalasy, №136 mektep-lıseıdiń 4-synyp oqýshysy Aıdana Dúısenbaeva, Qarmaqshy aýdany, №274 mektep-lıseıdiń 5-synyp oqýshysy Alýa Kalmyrzaeva jeńimpaz atandy.
Olarǵa «Elbasy Akademııasy» korporatıvtik qorynyń sertıfıkattary, arnaıy syılyqtar tabystaldy. Sonymen qatar oqýshylar salǵan úzdik sýretter qyrkúıek aıynda Nur-Sultandaǵy I halyqaralyq psıhologııalyq forým qonaqtarynyń nazaryna usynylady.
Ataýly jyldaǵy osyndaı sharalar ónerli órenderge óris ashyp otyr.
Qyzylorda