Memleket basshysy Nursultan Nazarbaev Sýdıalardyń VI sezinde respýblıka sottarynyń aldyna úlken mindetter qoıǵany belgili. Olardy múltiksiz oryndaý – ýaqyt talaby. Soǵan oraı atalǵan sezd ótkeli beri alǵa qoıylǵan irgeli mindetter birtindep júzege asyrylyp ta keledi. Máselen, Parlamentte Qylmystyq kodekstiń, Qylmystyq is júrgizý kodeksiniń, «Qazaqstan Respýblıkasy sot júıesi men sýdıalarynyń mártebesi týraly» Konstıtýsııalyq zańynyń, sot tóreligin júzege asyrýdy odan ári jeńildetý, bıýrokratııalyq rásimderdi azaıtý máseleleri jónindegi zańnamalyq aktilerdiń jobalaryn talqylaý barysynda Májilis depýtattary Joǵarǵy Sottyń birqatar bastamalaryn qoldady.
Endi, mine, osy jumystardyń aıqyn dáleli retinde Joǵarǵy Sot Tóraǵasy Qaırat Mámı jergilikti sottardyń tóraǵalarymen respýblıkada sot tóreligin júzege asyrý boıynsha 2014 jyldyń birinshi toqsanynda atqarylǵan jumystardyń qorytyndylary men aldaǵy kezeńdegi mindetteri týraly onlaın-keńes ótkizdi. Onda joǵaryda atap aıtqanymyzdaı, oblystyq jáne aýdandyq sottardyń basshylary, sondaı-aq, departamenttiń jáne onyń jergilikti jerlerdegi bólimshelerimen Sýdıalardyń VI sezinde Elbasy bergen tapsyrmalardyń oryndalýy, sonyń ishinde sot tóreligi salasyndaǵy zańnamany jetildirý boıynsha alǵashqy nátıjeleri talqylandy.
Joǵarǵy Sottyń jumys toby Azamattyq is júrgizý kodeksiniń jańa jobasyn ázirlep, ony keńinen talqylaýǵa shyǵardy. Jergilikti Sottarǵa osy joba boıynsha syndarly usynystar engizý tapsyryldy. Sonymen qatar, Prezıdenttiń О́kimimen bekitilgen Qylmystyq zańnyń jáne qylmystyq sot isin júrgizýdiń jańa modeline kóshý jónindegi biryńǵaı memlekettik is-qımyl josparyn iske asyrýǵa jedel túrde kirisýge tapsyrma berildi.
Q.Mámı azamattardyń sottarǵa júginý sanynyń kóbeıýi dınamıkasy saqtalyp otyrǵanyn, munyń ózi azamattardyń elimizdegi sot júıesine degen senim deńgeıiniń óskenin dáleldeıtinin atap ótti. Jalpy alǵanda, jumystyń kóbeıgenine qaramastan, sot tóreligin júzege asyrý sapasy tómendegen joq.
Keńeste jumys barysynda kemshilikterge jol bergen jekelegen oblystyq sot tóraǵalarynyń esepteri tyńdaldy. Budan basqa, sýdıa ádebi normalaryn saqtaý, sybaılas jemqorlyqqa qarsy sharalardyń tıimdiligin arttyrý máseleleri sóz boldy. Sýdıalardyń shtat sanyn kóbeıtý týraly Prezıdent Jarlyǵyn iske asyrý sheńberinde oblystyq jáne aýdandyq sottarǵa sýdıalyqqa kandıdattardy irikteý rásimderin jetildirý, qoıylatyn talaptardy kúsheıtý, olardy oqytý jáne taǵylymdamadan ótkizý máseleleri boıynsha tapsyrmalar berildi. Sottardyń BAQ-pen ózara is-qımylyn tıisti deńgeıde qamtamasyz etý, jergilikti jerlerdegi baspasóz qyzmetiniń jumysyn jaqsartý mindetteri qoıyldy.
Sot tóreliginiń ashyqtyǵy men qoljetimdiligin arttyrý jaǵdaılaryn qamtamasyz etý maqsatynda elektrondyq sot isin júrgizýdi, sot prosesin aýdıo jáne beınetirkeý júıesi men basqa da aqparattyq-kommýnıkasııalyq quraldardy odan ári engizýge qatysty tıisti tapsyrmalar berildi. Bul sot isin júrgizýge qatysýshylardyń istiń qozǵalysy týraly aqparatty jedel alýyna, sottyń shyǵarǵan sheshimderimen jáne ózge de sot aqparatymen tanysýyna múmkindik beredi.
Keńes jumysyn qorytyndylaı kele, Joǵarǵy Sot Tóraǵasy memleket sottardyń qyzmetin qamtamasyz etý baǵytynda barlyq sharalardy qabyldap otyrǵanyn, bul, óz kezeginde, sot tóreligin júzege asyrý sapasyn arttyrý boıynsha jumysty kúsheıtýge mindetteıtinin atap ótti.
Aleksandr TASBOLATOV,
«Egemen Qazaqstan».