О́zbekstannyń Buhara qalasynda Túrki memleketteri uıymy jas kóshbasshylarynyń IV Forýmy ótti, dep habarlaıdy Egemen.kz.
Forýmnyń ashylý saltanatynda Túrki memleketteri uıymynyń Bas hatshysy Baǵdad Ámireev Buhara qalasyna «Túrki álemi jastar bastamalarynyń alǵashqy astanasy» mártebesin berý týraly resmı sertıfıkatty tabystady.
Forýmǵa Qazaqstan atynan quramynda Prezıdent janyndaǵy jastar saıasaty jónindegi keńestiń músheleri, «Táýelsizdik urpaqtary» grantynyń ıegerleri, mýzyka, sport, kreatıvti ındýstrııa jáne IT salalarynda jetistikke qol jetkizgen talantty jastar bar delegasııa qatysty.
«Forým jumysy qoǵam, ǵylym, mádenıet jáne medıa jobalar - 4 ózekti baǵyt boıynsha júrgizildi. Is-sharada jas kóshbasshylar ózderiniń eń úzdik jobalaryn tanystyrdy. Úzdik spıkerlerdiń qatarynda «Aѕag-Ume» qaıyrymdylyq qorynyń jetekshisi Ashat Nurmashev pen «Laıf-nıýs» áleýmettik jobasynyń jetekshisi Dınara Naýmova boldy. A.Nurmashev baspanaǵa muqtaj jandarǵa qoldaý kórsetetin «Aѕag-Ume» qaıyrymdylyq qorynyń qyzmetimen tanystyryp, bul qor halyqtyń kómegimen jınalǵan qarajatqa turǵyn úıge muqtaj adamdardy baspanamen qamtamasyz etetinin aıtty. Bul jobaǵa basqa elderdiń jastary qyzǵýshylyq tanytyp, bolashaqta osyndaı jobalardy birlesip júzege asyrýǵa nıet bildirdi. D.Naýmova tirek-qımyl apparaty buzylǵan jas tulǵalardy ońaltý jaıynda oı bólisti», deıdi ABQO Basqarma tóraǵasynyń orynbasary Jasulan Bısembıev.
Sondaı-aq, bul kúnderi «Túrki áleminiń jastar saıabaǵy» jáne «Buhara - túrki áleminiń jastar bastamalarynyń alǵashqy astanasy» monýmenti ashyldy.
Aıta ketsek, Jas kóshbasshylar forýmy týrızmdi damytý, memleketter arasyndaǵy yntymaqtastyqty nyǵaıtý jáne tájirıbe almasý maqsatynda 2018 jyldan beri dástúrli túrde ótkizilip keledi.
Osy ýaqytqa deıin forým Ázerbaıjan, Qazaqstan jáne Qyrǵyzstan sııaqty elderde ótti. Forým aıasyndaǵy is-sharalar men kezdesýlerge barlyǵy 10 myńnan astam jas qatysty. Kelesi forým Túrkııanyń Býrsa qalasynda ótedi dep kútilýde.