QR Ulttyq banki tóraǵasynyń orynbasary Álııa Moldabekova mamyr aıynan bastap teńge baǵamy turaqtana bastaǵanyn aıtty, dep habarlaıdy Egemen.kz.
Búgin elordada ótken baspasóz máslıhatynda teńgeniń shetel valıýtasyna qatysty bir deńgeıde nyǵaıýyna qatysty saýal týyndady.
QR Ulttyq bankiniń tóraǵasy Ǵalymjan Pirmatov osy baǵytta Ulttyq bank erkin aıyrbas baǵamy saıasatyn ustanatynyn habarlady.
Bul rette, Álııa Moldabekova aqpan aıynan beri teńge baǵamynyń qubylmalyǵy geosaıası táýekelder men jahandyq naryqtaǵy ózgeristerge baılanysty bolǵanyn aıtty.
«Sondyqtan erkin aıyrbas baǵamy rejıminde turǵan teńgege atalǵan jaǵdaılar yqpal etti. Bizdiń oıymyzsha, teńgeniń erkin baǵamy syrtqy ahýalǵa ekonomıkamyzdyń ári naryǵymyzdyń jyldam beıimdelýine múmkindik beredi. Mamyr aıynan bastap jaǵdaı turaqtandy. Buǵan syrtqy naryqtardaǵy ahýaldyq turaqtanýy yqpal etti. Qazirgi kezde munaıdyń, energııa resýrstarynyń baǵasy óskenin baıqap otyrmyz. Bul resýrstar bizdiń eksportqa shyǵaratyn negizgi taýarymyz bolyp otyr», dedi Álııa Moldabekova.
Ulttyq bank tóraǵasynyń orynbasary atalǵan turaqtaný prosesine eksporttaýshylar tarapynan shetel valıýtasyndaǵy usynystarynyń artýy yqpal etkenin atap ótti.
«Sondyqtan valıýta naryǵyndaǵy jaǵdaı teńdestirilgenin kórip otyrmyz», dedi ol.