Aıyrtaý aýdandyq jumyspen qamtý ortalyǵynyń dırektory A. Júsipovanyń «Jumyspen qamtý-2020» baǵdarlamasy sheńberinde bólingen qarjyny zańsyz paıdalandy degen qylmystyq kinási dáleldendi.
Tergeý barysy kórsetkendeı, 2012 jyldyń sáýirinde Aıyrtaý aýdany ákimdiginiń qaýlysymen áleýmettik jumys oryndaryn uıymdastyrýdy usynǵan jeti kásiporyn jumys berýshi retinde bekitilgen. Alaıda, jumyspen qamtý ortalyǵynyń basshysy qyzmettik ókilettigin asyra paıdalanyp, jumyssyzdardy áleýmettik jumys oryndarymen qamtıtyndyǵy, al jumysqa ornalasýshylardyń eńbekaqysy memlekettiń esebinen ishinara tólenetindigi jaıly zańsyz kelisimshart jasaǵan.
Sonymen birge, dırektor «Halyqty jumyspen qamtý týraly» Zańnyń tıisti talaptaryn óreskel buzý arqyly tóleýge beriletin shottarǵa qol qoıyp, kásiporyndardyń esepshottaryna «áleýmettik jumysqa ornalasqan azamattardyń» aqpan jáne naýryz aılarynyń eńbekaqysy retinde 1,87 mıllıon teńge aqsha aýdarǵan. Aqıqatyna kelsek, bul ýaqyt aralyǵynda bıýdjet qarjysy aýdarylǵan 36 adam jumyssyz retinde esepte turmaǵan. Olar, tipti, memlekettik baǵdarlamanyń qatysýshysy da bolmaı shyqqan.
Osy kezeńde dırektor kórsetilgen qyzmet jóninde 9 jalǵan qujatqa qol qoıǵan. Bul aktilerde de azamattardyń áleýmettik jumys oryndarynda eńbek etip jatqandyǵy týraly jalǵan aqparat kórsetilgen.
Osylaısha jalǵan qujattar jasaý arqyly jalǵandy jalpaǵynan baspaq bolǵan kúdiktiniń qylmysy bultartpas aıǵaqtarmen dáleldendi.
Nurlan JAHIN,
Ekonomıkalyq qylmysqa jáne sybaılas
jemqorlyqqa qarsy kúres departamentiniń
baspasóz hatshysy.
Soltústik Qazaqstan oblysy.