Ahmet Baıtursynulynyń 150 jyldyǵyna oraı, Qostanaıdan «Ahań júrip ótken jolmen» atty arnaıy ǵylymı-tanymdyq ekspedısııa jolǵa shyqty. Sapardyń maqsaty – ult ustazynyń ómiri men qyzmetine qatysty tyń derekterdi izdestirip, jınaqtaý.
Jobany Sanaly urpaq-2050 qoǵamdyq birlestigi memlekettik tapsyrys aıasynda iske asyrady. Uıymdastyrýshylardyń aıtýynsha, ekspedısııa Qazaqstannyń birqatar óńirine jáne Reseı, Qytaı, Ázerbaıjan elderine de barady. Ekspedısııa músheleri Orynbor, Máskeý, Arhangelsk, Baký, Chelıabi, Qarqaraly, Semeı, Qarabutaq, Áýlıekól, Torǵaı óńirlerin aralaýdy josparlap otyr.
– Jobany júzege asyrýshylardyń qatarynda ahmettanýshylar, tarıhshylar, jýrnalıster, sondaı-aq mýzeı jáne arhıv isi salasyndaǵy mamandar bar. Sapar qorytyndysy boıynsha Ahmet Baıtursynulynyń ómiri týraly jańa derekterden quralǵan fılm shyǵarý kózdelip otyr. Sonymen qatar arhıv, mýzeı qorlary jańa qujattarmen tolyǵady degen úmittemiz, – dedi oblystyq mádenıet basqarmasy basshysynyń orynbasary Gúljan Meńdekenova.
5 maýsymda jolǵa shyqqan ekspedısııa músheleri Nur-Sultan qalasy arqyly Qaraǵandy oblysyna ótip, Qarqaralyǵa barady.
– Men Ahańdy zertteýmen 1989 jyldan beri turaqty aınalysyp kelemin. Ahańnyń tabany tıgen jerlerge buryn da barǵanmyn. Biraq ol saparymda derekterdi jınaqtamaǵan edim. Endigi ekspedısııa oljaly bolady degen senimdemin, – deıdi ahmettanýshy Ibrahım Aǵytaı.
Qostanaı oblysy