Parsy eliniń pehlevandary ozdy

Atalǵan jarysta ózderiniń ójettigi jáne tabandylyǵymen kózge túsken eki jas órendi erekshe atap ótkimiz keledi. Birinshisi – 70 kılo salmaqta saıysqa túsken Rodıon Anchýgın. 20 jastaǵy balýan Almaty tórinde keremet óner kórsetti. Eń bas­tysy, ol qorqý men qaımyǵýdy bilmedi. Aldynda azýly qarsylas tursa da aıanbaı aıqasty. Osy týrnırde ózbekstandyq Zafarbek Otahanov pen úndistandyq Vıhal Kalıramana syndy kókjaldardy jeńgen ol fınalda Ernazar Ahmat­alıevpen kúsh synasty. Qyrǵyz balýany byltyr Osloda álem jáne bıyl Ulanbatyrda Azııa chempıonatynyń kúmis júldegeri atanǵan. Tóreshi belgi bergen bette otandasymyz Ahmatalıevty bas salyp, ábden silikpesin shyǵardy. Básekelesi ondaıdy kútpese kerek, alǵashynda biraz ańtarylyp qaldy. Al Anchýgın alty upaı alsa da, atoılap utamyn dep alǵa umtyldy. Biraq tájirıbeniń aty tájirıbe ǵoı. Bir mezette ol Er­nazardyń ońtaıly ádisine túsip qaldy. Desek te Rodıonǵa ókpe aıtqan eshkim bolmady. Negizi bul salmaqta basty úmit biraz jyldan beri ulttyq komandamyzdyń sapynda júrgen Meıirjan Áshirov pen Amandyq Bakeevke artylǵan edi. Biraq olar «uzaqqa shappady».

Dál sondaı ójettikti 57 kılo salmaqtaǵy Mereı Bazarbaevtyń da boıynan baıqadyq. 19 jasar qandasymyz kópti kórgen kók­jal­dardyń barlyǵymen ábden tiresti. Tipti talaı dúrmekte ysyl­ǵan dúl­dúlderdiń ózderi qazaqt­yń uly­nyń qaısarlyǵyna tamsandy. Kó­rermender de dán rıza boldy. Osy týrnırde Bazar­baevqa qola medal buıyrdy. Bul – Mereı­diń sporttyq mansabyndaǵy ázirge eń iri jeńis. Jarys aıaqtalǵan bette qyraǵy mamandardyń ózderi «Osy baǵytynan jańylmasa, myna jigit­­tiń bolashaǵy jarqyn bolady» desip jatty.

Qazaqstan quramasy Bolat Turlyhanovtyń týrnırin 1 altyn, 5 kúmis jáne 6 qolamen qory­tyndylady. Bir qýanyshtysy, alty birdeı jerlesimiz fınalǵa shyqty. Al solardyń beseýiniń syn saǵatta súringenin kórgende ishimiz ýdaı ashydy. Radıon Anchýgınniń fınalda jeńil­genin joǵaryda aıttyq. Sol se­kildi 92 kılo sal­maqtaǵy Ádi­let Daýlynbaev ta tym azý­ly qarsylasqa tap boldy. Osy­ǵan deıingi básekeleriniń bar­ly­ǵyn 10:0 esebimen utqan álem jáne Azııanyń eki dúrkin chem­pıony Kamran Gasempýr qan­dasymyzdyń da tas-talqanyn shy­ǵardy. Irannyń myqtysy Ádiletke adym ashtyrmady. Daý­lynbaevqa qaraǵanda asa aýyr salmaqtaǵy Iýsýp Batyrmýr­zaev jaqsy kúresti. Onyń fınal­daǵy qarsylasy – Tokıo Olım­pıa­dasynyń qola júldegeri, byl­tyr­ǵy álem chempıony ıran­dyq Amır Hosseın Abbas Zare edi. Beldesý bastalǵan bette eki alyp alysa ketti. Iýsýp ony ki­lemge jyǵyp alyp, ári de, beri de aınaldyrdy. Jerlesimizdiń qorjynyna birden segiz upaı tústi. Taǵy eki upaı alsa, aıqyn jeńiske qol jetkizedi. Biraq myqtynyń aty myqty ǵoı. Odan keıin Zare ketken esesin tolyǵymen qaıtardy. Batyrmýrzaev sharshap qaldy. Qorytyndysynda ırandyq 21:10 esebimen basym tústi.

Fınalda 57 kılo sal­maq­ta synǵa túsken tájirıbeli Meıram­bek Qartbaı úndistandyq Aman Amandy utatyn shyǵar dep úmit­tendik. О́ıtkeni onyń qar­sy­lasynan bes jas úlkendigi bar. Iаǵnı úndi sportshysyna qara­ǵanda tájirıbesi mol. Biraq 17 ja­sar Aman naǵyz «sen tur, men ataıynnyń» dál ózi eken. Beldesý barysynda Meırmabekten utylyp jatqan ol aıaǵyna deıin kúresip, aqyry kózdegen maqsatyna qol jetkizdi. Al 61 kılo salmaqtaǵy Jasulan Tasquldyń 23 jastaǵylar arasyndaǵy álem birinshiliginiń kúmis júldegeri degen ataǵy bar qyrǵyzstandyq Bekbolot Myr­zanazarulyna áli jetpedi.

Qazaqstannyń balýandary ara­synan jalǵyz altyn Bolat Sa­qaevqa buıyrdy. 79 kılo sal­maqta kúresken ol shırek fınalda óziniń komandalyq áriptesi Jiger Zákirovti jeńse, jartylaı fınalda Eýropa chempıony, slovakııalyq Ahsarbek Gýlaevtan basym tústi. Fınalda Saqaev Azııa birin­shiliginiń birneshe dúrkin júl­degeri qyrǵyzstandyq Saıaqbaı Iýsýpovty san soqtyryp, bas júldeni qanjyǵasyna baılady. Osylaısha, Bolattyń arqasynda Balýan Sholaq atyndaǵy sport saraıyna jınalǵan dúıim jurt Qazaq eliniń ánuranyn estidi. Al Mereı Bazarbaev (57 kılo), Eldos Mombekov (61 kılo), Nurqoja Qaıpanov (74 kılo), Dáýlet Ergesh (74 kılo), Ábdimanap Baıgenjıev (92 kılo) jáne Ákejan Aıtbekov (97 kılo) qola medaldy moıyndaryna ildi.

Jalpykomandalyq esepte kileń juldyzdardan jasaqtalǵan Irannyń erkin kúres sheberleri aldyna jan salmady. Parsy eliniń pehlevandary 3 altyn men 1 kú­misti oljalady. Grek-rım kúre­sinen ótken jarysta da dál solar oza shapqan edi. Slovakııa men Qyrǵyzstan balýandarynyń nátı­jeleri birdeı. Eki komanda da 2 altyn, 1 kúmis jáne 1 qo­ladan oljalady. Bir aıta keter­ligi, Slovakııanyń namysyn qor­ǵaǵan jigitterdiń barlyǵy da ose­tınder. Sondaı-aq Mońǵolııa (1+1+1), Úndistan (1+0+2), О́z­bekstan (0+1+4) jáne Túrkııa men Mysyr (0+0+1) órenderine de je­ńis tuǵyryna kóterilý baqyty buıyrdy.

Erkin kúresten ótken jarys­tyń jeńimpazdary: 57 kılo – Aman Aman (Úndistan), 61 kılo – Bekbolot Myrzanazaruly (Qyr­ǵyzstan), 65 kılo – Týlga Týmyr Ochır (Mońǵolııa), 70 kılo – Ernazar Ahmatalıev (Qyr­ǵyzstan), 74 kılo – Taımýraz Sal­kazanov (Slovakııa), 79 kılo – Bolat Saqaev (Qazaqstan), 86 kılo – Hassan Iаzdanı (Iran), 82 kılo – Kamran Hassanpýr, 97 kılo – Batyrbek Sakýlov (Slovakııa) jáne 130 kılo – Amır Hosseın Abbas Zare (Iran).