Balalar teatry festıvali

Oral qalasyndaǵy Mádenı-aǵartý birlestigi mekemesi uıymdastyrǵan bul teatr toıy Qazaqstannyń halyq ártisi, «Otan» ordeniniń ıegeri, kıno jáne teatr aktrısasy H.Bókeevanyń 105 jyldyǵyna da arnalyp otyr.

Teatr festıvaline Aqtóbe oblysynan Nurpeıis Baıǵanın atyndaǵy Temir aýdandyq mádenıet úıiniń janynan qu­rylǵan «Amanat» jastar teatr­y, Aqtóbe qalalyq mádenıet úıiniń «Aqtóbe» balalar teatry, Aqtóbe oblysy Quraıly mádenıet úıiniń ALL-Art balalar jáne jasóspirimder teatry, Atyraý oblysy Qur­manǵazy aýdanynan О́nerpaz aýyldyq mádenıet úıi janyndaǵy «Orly» halyq teatry ujym­dary arnaıy keldi. Sondaı-aq Batys Qazaqstan oblysynan Syrym aýdandyq mádenı-demalys ortalyǵynyń teatry, Aqjaıyq aýdandyq mádenı-de­malys ortalyǵynyń teatry, Qaratóbe aýdandyq mádenı-demalys ortalyǵynan Oscar balalar men jasóspirimder teatr­y, Oral qalasynan Maqasheva teatry, Dına Nurpeıisova atyndaǵy bala­lar mýzyka mektebiniń úlken jáne kishi toptary, «Altyn Orda» balalar men jas­óspirimderdiń qoǵam­dyq teatry, bar­lyǵy 150-den asa balǵyn óner­paz qaty­syp jatyr.

Teatr festıvaline qatysýshy ujym­dardy Oral qalasy mádenıet jáne til­derdi damytý bóliminiń basshysy Serik Kaıyrlıev qabyldap, jetekshilerge sát­tilik tiledi. Al festıvaldyń ashylý sal­tanatynda «Jastar mádenıet saraıy­nyń» «Uly dala toıy» «Alash» etno­fol­klorlyq ansambli, «Saltanat» bı an­­sambli óner kórsetti.

– Mundaı óner dodasy qalamyzda tuńǵysh ret uıymdastyrylyp otyr. Bas­tamamyzdy qoldaǵany úshin Oral qa­lasy ákimdigi men Batys Qazaqstan ob­lystyq mádenıet basqarmasyna alǵys aıtamyz. Teatr óneri kórermendi sıqyr­ly qııal álemine tartyp qana qoı­maı, halyqty estetıkalyq talǵamǵa, adam­gershilik pen izgilikke tárbıeleýdiń asa mańyzdy quraly ekeni sózsiz. Jas urpaq áleýmettik jelige kiriptar bolǵan qazirgi zamanda osyndaı belsendi ónerdiń mańyzy óte úlken. Bizdiń maqsatymyz – balalar shyǵarmashylyǵyn damytyp, kórshiles oblystar arasynda mádenı baılanysty tereńdetý. Festıvalǵa qaty­syp jatqan barlyq ujymǵa sát­­tilik tileımiz, – dedi Oral mádenı-aǵar­tý birlestiginiń basshysy Serik Toqmámbetov.

Festıval eki kúnge sozylady. Sa­ıysqa Ǵ.Músirepov atyndaǵy Qa­zaq memlekettik akademııalyq balalar men jasóspirimder teatrynyń ak­teri, «Qurmet» ordeniniń ıegeri Edil Rama­zanov bastaǵan qazylar alqasy tórelik etýde. Bolashaqta bul óner saıysyn eki jylda bir márte ótkizip turamyz deıdi uıymdastyrýshylar.

Batys Qazaqstan oblysy