Premer-Mınıstrdiń birinshi orynbasary Roman Sklıar Qazaqstanda dızel tapshylyǵy joq ekenin málimdedi, dep habarlaıdy Egemen.kz.
«Qazirgi ýaqytta elde janar-jaǵarmaıdyń, sonyń ishinde dızel otynynyń tapshylyǵy baıqalyp otyrǵan joq», delingen Roman Sklıardyń depýtattar saýalyna jazylǵan jaýapta.
Ol óz jaýabynda ishki munaı ónimderiniń teńgerimin saqtaý maqsatynda 2022 jyldyń aıaǵyna deıin munaı ónimderin Qazaqstan aýmaǵynan syrtqa áketýge tyıym salý máselesi pysyqtalyp jatqanyn aıtty. Al ishki naryqta janarmaı saýdasynyń shekteýli kólemde ǵana júrýin boldyrmaý úshin suranys, usynys, baǵa teńgerimine udaıy taldaý jasalyp otyr.
«Búginde munaı óńdeý zaýyttary shtattyq rejımde jumys isteıdi. Oǵan qosa janarmaı óndirý jáne taratý júıesin reformalaýdyń keshendi sharalary qabyldandy. Ol boıynsha ónimsiz deldaldardy naryqtan yǵystyryp, munaıdy óńdeýshi zaýyttarǵa jetkizý shemasy qaıta qaralady. Osylaısha Úkimet janar-jaǵarmaı baǵasynyń negizsiz ári kúrt ósýin boldyrmaý úshin qajetti sharanyń bárin qabyldap jatyr», dedi Roman Sklıar.