Qazaqstan Premer-Mınıstri Álıhan Smaıylov Belarýs Premer-Mınıstriniń birinshi orynbasary Nıkolaı Snopkovpen kezdesý ótkizdi, dep habarlaıdy Egemen.kz.
Kezdesý barysynda Álıhan Smaıylov Qazaqstannyń Belarýs memleketimen yntymaqtastyqty odan ári tereńdetýge, onyń ishinde ózara saýda jáne ınvestısııalyq baılanystardy nyǵaıtýǵa basa nazar aýdaratynyn atap ótti.
«Ekijaqty taýar aınalymyn ulǵaıtý jáne eki el arasyndaǵy saýda-ekonomıkalyq kooperasııany damytý úshin barlyq múmkindik bar dep sanaımyn», dedi QR Premer-Mınıstri.
Qazaqstan Úkimeti basshysynyń aıtýynsha, búgingi tańda ónerkásiptik kooperasııa salasynda Belarýs tarapymen birlesip, jalpy somasy $100 mln 7 joba júzege asty. Quny $14 mln taǵy 2 joba qolǵa alyndy, sondaı-aq jańa jobalar pysyqtalyp jatyr. О́z kezeginde Nıkolaı Snopkov Belarýs Respýblıkasynyń Qazaqstanmen barlyq baǵytta ózara tıimdi qatynastardy keshendi damytýǵa múddeli ekenin atap ótti.
«Biz – ýaqyt synynan ótken seriktestermiz, sondyqtan bizdiń mindetimiz – barlyq salalarda yntymaqtastyqty arttyrý jáne tereńdetý. Onyń negizi óndiristik kooperasııa jáne elder arasyndaǵy ártúrli bıznes baılanystardy nyǵaıtý», dedi Belarýs Respýblıkasynyń birinshi vıse-premeri.
Kezdesý barysynda taraptar qurylys, aýyl sharýashylyǵy jáne energetıka salasyndaǵy birlesken jobalardy iske asyrý, azamattyq avıasııa salasyndaǵy ózara is-qımyl, sondaı-aq 2022 jylǵy shildede Vıtebskide «Slavıan bazary» halyqaralyq óner festıvali aıasynda Qazaqstannyń Belarýs Respýblıkasyndaǵy mádenıet kúnderin ótkizý máselesin talqylady.
Aıta keteıik, Nıkolaı Snopkov Qazaqstan-Belarýs saýda-ekonomıkalyq yntymaqtastyq jónindegi úkimetaralyq komıssııasynyń 17-otyrysyna qatysý úshin Nur-Sultanǵa kelgen bolatyn.