Bul kásibı merekeni dúnıe júzindegi tarıh paraqtaryn kóziniń qarashyǵyndaı saqtap, bolashaq urpaqqa amanat etetin mamandar atap ótedi, dep habarlaıdy Egemen.kz.
Merekeni dál osy kúni belgilenýi beker emes, sebebi 1948 jyly IýNESKO-nyń sheshimimen Halyqaralyq arhıvter keńesi qurylǵan bolatyn. Al 2007 jyly qarashada Kanadanyń Kvebek qalasyndaǵy Bas assambleıada «9 maýsym – Halyqaralyq arhıvter kúni» dep resmı túrde bekitti. Al Qazaqstanda arhıvshiler kúni 2020 jyly Úkimettiń qaýlysymen 22 jeltoqsan dep bekitilgen, al reseılik áriptester 10 naýryzda, belarýstar 6 jeltoqsanda, qyrǵyz eliniń arhıvshileri 30 tamyzda atap ótedi. Arhıv kúni ár elde túrli ýaqytta belgilengenimen, dál osy kún álemdegi barlyq arhıvshilerdi biriktiredi.
Bul kásibı merekede Qazaqstan Respýblıkasy Prezıdentiniń Arhıvi de qalys qalmaıdy. Prezıdent Arhıvi Memleket basshysynyń 1994 jylǵy 14 qańtardaǵy Jarlyǵymen burynǵy Ortalyq memlekettik qazirgi zaman tarıhy arhıviniń negizinde qurylǵan. Búgingi tańda arhıvte 856 myńnan astam isti qamtıtyn 1014 qor saqtaýly. Onda 1918 jyldan bastap elimizdiń saıası tarıhynyń qujattary bar. Sonymen qatar qoǵam qaıratkerleriniń jeke tektik qujattary men basqarý qujattamasy da jınaqtalǵan. Táýelsizdik alǵannan keıingi Prezıdent aktileriniń túpnusqalary, halyqaralyq jıyndardaǵy baıandama mátinderi, fotosýretteri de saqtaýly.
Elimizde qujattardy qunttaıtyn 200-den asa arhıv bar, olar Qazaqstan Respýblıkasynyń 1998 jylǵy 22 jeltoqsandaǵy «Ulttyq arhıv qory jáne arhıvter týraly» Zańyna saı jumys isteıdi. Jalpy arhıvtik derekter adamzattyń saıası tarıhy, ekonomıkalyq jáne áleýmettik damýynyń qujattaryn jınaıtyn negizgi mekeme sanalady. Sondyqtan Arhıvter kúni sala mamandarynyń kásibı merekesi ǵana emes, jalpy halyqtyń nazaryn aýdarý úshin belgilengen ataýly data.
Aıana Toǵanbek