Búgin Prezıdenttiń tóraǵalyǵymen Sheteldik ınvestorlar keńesiniń 34-shi plenarlyq otyrysy ótti. Jıynǵa iri transulttyq kompanııalardyń, memlekettik organdardyń basshylary men halyqaralyq uıymdardyń ókilderi qatysty, dep habarlaıdy Egemen.kz Aqordanyń resmı saıtyna silteme jasap.
Otyrystyń kún tártibinde ekonomıkany kómirteginen aryltý isin damytý jáne kómirtegin az paıdalaný tehnologııalaryn engizý máseleleri qarastyryldy.
Memleket basshysy búgingi otyrys halyqaralyq ahýaldyń shıelenisken jaǵdaıynda ótip jatqanyn atap ótti.
«Jahandyq logıstıka júıesiniń buzylýy, saýda soǵystary, buryn-sońdy bolmaǵan ınflıasııalyq qysym – munyń bári búgingi kúnniń shynaıy kórinisi. Mundaı jaǵdaıda memleket pen bıznes jańa oıyn erejelerine tez beıimdelýi kerek. Biz tek osylaı ǵana básekege qabilettiligimizdi saqtaı alamyz», dedi Prezıdent.
Qazaqstan Prezıdenti ınvestısııalyq ahýaldy odan ári jaqsartý jáne ınvestorlardyń zańdy quqyǵyn qorǵaý júıesin jetildirý memleketimizdiń strategııalyq mindeti ekenin atap ótti.
«Byltyr sheteldik seriktester bizdiń ekonomıkamyzǵa shamamen 24 mıllıard dollar ınvestısııa saldy. Bul onyń aldyndaǵy jylmen salystyrǵanda 38 paıyzǵa kóp. Bir aıta keterligi, sheteldik ınvestısııanyń 60 paıyzdan astamy qazirdiń ózinde ekonomıkanyń shıkizattyq emes sektoryna tıesili. Biz bul ınvestısııalardy joǵary baǵalaımyz jáne sheteldik seriktester aldyndaǵy barlyq mindettememizdi minsiz oryndaýǵa bar kúshimizdi salamyz. Qazaqstan ınvestorlar úshin ashyq esik saıasatyn kúsheıte túsedi», dedi Memleket basshysy.
Qasym-Jomart Toqaev el ekonomıkasyndaǵy kómirtegin paıdalaný kólemin tómendetý jáne ekonomıkalyq shyǵyndardyń aldyn alý úshin atqarylyp jatqan sharalarǵa egjeı-tegjeıli toqtaldy. Atap aıtqanda, qaldyqtardy saýdalaýǵa qatysty ulttyq júıeni eýropalyq júıege jaqyndatý jóninde Úkimettiń atqaryp jatqan jumysy týraly málimdedi.
«Parnıktik gaz qaldyqtarynyń úlestik koeffısıentteriniń esepteý ádistemesin kúsheıtý baǵytynda qaıta qaraýdy jedeldetý qajet. Esepteý tásili eýropalyq ádiske sáıkes, ıaǵnı saladaǵy eń ozyq 10 óndiris negizinde jasalýǵa tıis. Osy rette óndiristiń negizgi ǵana emes, qosalqy túrlerin de eskerý kerek. Sondaı-aq Eýropa odaǵynyń qaldyqtardy satý júıesi sııaqty ekonomıka sektorlaryn keńinen qamtý qajet. Keńes músheleri is júzinde kómek kórsetýge tıis. Bul jumysty kelesi jyly aıaqtaý qajet», dedi Prezıdent.
Qazaqstan basshysy atap ótken taǵy bir mańyzdy mindet – aýmaqtardy kógaldandyrý jáne jańa alqaptarǵa aǵash otyrǵyzý.
«Meniń tapsyrmammen 2025 jylǵa deıin elimiz boıynsha eki mıllıard aǵash otyrǵyzý josparlanyp otyr. О́tken jyly 138 mıllıon, al bıyl 280 mıllıon aǵash egildi. Alaıda bul qarqyn jetkiliksiz, ony jyldamdatý qajet. Keńes múshelerin atalǵan bastamany qoldap, osy iske eleýli úles qosýǵa shaqyramyn», dedi Memleket basshysy.
Prezıdent elimizde gaz tutynýǵa suranystyń artqanyn atap ótip, kómirdi paıdalanýdy azaıtý isinde gaz salasynyń mańyzdy ról atqaratynyn aıtty.
«Gaz eksportyna qaraǵanda ishki qajettilikterdi qamtamasyz etý mańyzdy ekenin qadap aıtqym keledi. Úkimetke Teńiz ken ornynyń aksıonerlerimen birlese otyryp, eksporttalatyn eki mıllıard tekshe metr gazdy ishki naryqqa qaıta baǵyttaýdy tapsyramyn», dedi Qasym-Jomart Toqaev.
Memleket basshysy jańartylatyn jáne balamaly energııa kózin damytý áleýetiniń artyp kele jatqanyna toqtaldy. 2030 jylǵa qaraı elimizdiń energııa teńgerimindegi jańartylatyn energııa kózin keminde 15 paıyzǵa deıin arttyrý mindeti qoıyldy.
Sonymen qatar Prezıdent atom energııasyn paıdalanýdyń mańyzdy ekenin atap ótti. Onyń pikirinshe, jańartylatyn energııanyń turaqsyz jáne gaz taratý isi shekteýli bolǵan jaǵdaıda «zalalsyz» atom úzdiksiz energııa berýdiń jalǵyz kózi bolady.
Aıana Toǵanbek