Mańǵystaý oblysyndaǵy «Alatoo» qyrǵyz etnomádenı ortalyǵy qashanda qaıyrymdy isterdiń ortasynan tabylady. Jetekshisi Qurbanáli Gazybekov bilgir baǵban, besaspap agronom. Kók ósimdikke jutań qalada kóshe boıyn abattandyrý, jeke turǵyn úılerdiń mańyna aǵash, gúl otyrǵyzý isinde Qurbanáli aǵaıǵa jolyqpaıtyn adam sırek.
Kóńili darhan Qurbanáli eshkimnen qolqaıyryn aıaǵan emes. Tipti, Qurban aıt, Naýryz toıy merekelerinde turmysy tómen otbasylarǵa óz eginjaılarynda ósken jemis-jıdek, kókónis túrlerin tegin taratyp júretindiginen de habardarmyz. Qaıyrymdylyq kómek jasaýdy saýapty is, azamattyq mindet dep qana emes, ultaralyq tatýlyqty basty orynǵa qoıǵan memlekettik saıasattyń órkendeýine, táýelsiz Qazaqstannyń damýyna qosqan úles dep esepteıtin ol únemi jaqsy bastamalardyń uıytqysy. О́zara tatý, birin-biri ishtarta syılaǵan ózi basqaratyn «Alatoo» etnomádenı birlestigi múshelerin bir kisideı jumyldyrǵan Q.Gazybekov taǵy da jurt súısingen jaqsy isti bastap ketti. Olar bul joly qaıyrymdylyq sharany Aqtaý qalasyndaǵy otbasy úlgisindegi balalar aýylynyń aýlasyn abattandyrýǵa arnapty.
Biz atalmysh aýylǵa atbasyn tiregende aıyr qalpaqty qyrǵyz aǵaıyndar kólikten túp-túp aǵash kóshetteri men qural-saımandaryn túsirip jatyr eken. Áp-sátte 49 bala tárbıelenip jatqan 7 úıdiń aýlasyna bólinip, jumysty qyzdyryp áketti. Jas-kárisi, er men áıel aralas 20-shaqty adam jumysqa bir kisideı bilek sybana kiristi. Jastar jaǵy jer qazsa, ózgeleri shybyqty ustap, úshinshisi túbin kómip degendeı tirlikteri jarasym taba qaldy. Eńbek yrǵaǵyn kózimen qadaǵalap, qajetti jerinde tıisti tapsyrmasyn, aqyl-keńesin berip tynym tappaı júrgen Q.Gazybekovti sózge tarttyq.
– 50 túp raýshan gúlin, 25 túp jemis jáne 25 túp japyraqty aǵashtardy, sıren kóshetterin alyp keldik. Mundaǵy balalar ata-ana qamqorlyǵynsyz qalyp, taǵdyrdyń qıyndyǵyna tap bolǵandar. Alaıda, memleketimiz olardy ash-jalańash qaldyrmaı, tentiretpeı baǵyp-qaǵyp ósirýde, laıyqty bilim alýda. Elbasy Nursultan Nazarbaev bastaǵan osy ádemi úrdiske ún qosyp, qoldaý kórsetý maqsatynda qaıyrymdylyq sharasyn ótkizýdi, balalar úıiniń aýlasyna aǵashtar otyrǵyzyp berýdi durys dep taptyq. Bul sharany Astana qalasynda ótken Qazaqstan halqy Assambleıasynyń sessııasyna jáne alda kele jatqan Qazaqstan halyqtary birligi kúni merekesine arnaımyz, – deıdi ol.
Otbasy úlgisindegi balalar aýylyn da – dostyq uıasy deýge bolady. Osydan 9 jyl buryn ashylyp, osy jyldar ishinde 50 balany kámelettik jasqa tolǵan azamat retinde úlken ómirge qosqan aýylda qazir qazaq, orys, ázerbaıjan, lezgın balalary tatý-tátti turyp jatyr. Olar qyrǵyz aǵa-apalaryna kómektesip zyr júgirip júr. Aǵash otyrǵyzyp, yqylas tanytqan «Alatoo» qyrǵyz etno-mádenı birlestigine, Qazaqstan halqy Assambleıasynyń Mańǵystaý oblystyq hatshylyǵyna alǵysyn bildirgen atalmysh aýyl dırektorynyń orynbasary B.Oljabıqyzy munyń bári dostyqtyń, tynyshtyqtyń nátıjesi ekendigin aıtyp, elimizde merekeli tirliktiń tini sógilmeýine tilektestigin bildirdi.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.
–––––––––––––––––––––––––
Sýretti túsirgen
Vıktorııa DEKTIаROVA.