Qart qurlyqtan oljaly oraldy

Qazaqstan tennıs federa­sııasynyń málimeti boıynsha Arsenıı Trebýhın Grýzııanyń astanasy Tbılısıde uıym­dastyrylǵan 14 jasqa deıingi tennısshiler arasynda ótken úshinshi sanattaǵy jarystyń absolıýtti jeńimpazy atandy. Almaty tennıs mektebiniń túlegi sanalatyn A.Trebýhın jekeleı synnyń fınalynda osy týrnırdiń birinshi raketkasy reseılik Artem Se­me­novti eki sette – 6:3, 6:1 ese­­­bimen tize búktirdi. Bul – otandasymyzdyń Eýro­pa­daǵy eń alǵashqy iri jeńisi. Sondaı-aq Trebýhın atal­ǵan týrnırdiń juptyq báse­kesinde de top jardy. Ol al­matylyq Rodıon Lýka­shov­pen birge jup qurap, bas júl­de úshin ótken matchta reseı­lik­ter Ivan Makarov pen Mı­roslav Morozovtan aılasyn asyrdy – 7:5, 6:2.

Sonymen qatar Tbılı­sıdegi 16 jasqa deıingi sport­shylar arasyndaǵy dodada aqtóbelik Demıd Gorbachev fınalǵa deıin jetip, sheshýshi oıynda Eýropanyń 15-raketkasy reseılik Sava Rybakınge jol berdi – 4:6, 6:7 (3:7). Degenmen D.Gorbachev juptyq synda top jardy. Mansur Shákenmen birge ol fınalda re­seılikter Vladımır Kado­bıne men Anton Katarsevten aılasyn asyrdy – 6:2, 6:0.

Latvııanyń bas shahary – Rıgadaǵy ekinshi sanattaǵy Eýropa dodasynda 12 jasqa deıingiler arasynda Jantóre Sanjaruly jekeleı jáne juptyq synnyń fınalısi atandy. Jekeleı synnyń fınalynda ol fınlıandııalyq Aleks Toýmollınge ese ji­berse (0:6, 3:6), juptyq syn­da ulybrıtanııalyq Hakım Kamalmen birge latvııa­lyq Gýstavs Brıts pen A.Toý­mollınnen utylyp qaldy – 1:6, 2:6.

Al Chernogorııadaǵy 18 jasqa deıingiler arasynda tórtinshi sanattaǵy ITF týr­nırinde qazaqstandyq Satı Áýbákirova da juptyq synda fınalǵa deıin jetip, júldege synyq súıem qal­ǵanda súrindi. Qytaılyq Ifeı Hýangpen birge jup qu­raǵan Satı Áýba­kirova ıta­lııalyqtar Anas­tasııa Bertachchı men Francheska Gan­dolfıden jeńilip qaldy – 0:6, 4:6.

Sondaı-aq Shymkenttegi ATF (Azııa tennıs federasııasy) serııasy boıynsha 16 jasqa deıingiler arasyn­da halyqaralyq ja­rys óz máresine jetti. Mun­da boz­ba­lalar arasynda el­or­da­lyq Vıacheslav Kýfeld je­ńis tuǵy­ryna kóterilse, jup­tyq synda aqtóbelik Svıa­to­slav Býreev pen shym­kent­tik Iman­ǵalı Rahym­baev­tyń baǵy jandy. Qyzdar ara­syn­da almatylyq Polına Slep­sovanyń mereıi ústem boldy. Juptyq synda shym­kenttik Ádemi Amankeldi men ózbekstandyq Shahzoda Ar­tyqbaeva chempıon atandy.