Kúni keshe Kásibı tennısshiler qaýymdastyǵy (ATP) men Áıelder tennıs qaýymdastyǵy (WTA) sportshylardyń reıtıngin jarııalady. Ázirge jerlesterimiz arasyndaǵy eń úzdik nátıje – Elena Rybakınaǵa tıesili.
Qyzdar arasyndaǵy Qazaqstannyń birinshi raketkasy bul aptadaǵy reıtıngte 21-ornyn saqtap qaldy. Zarına Dıas kún ozǵan saıyn reıtıngte tómen quldyrap barady. Kezinde TOP-10 tennısshiniń qataryna kirýge ýáde bergen ol qazirgi tańda 199-orynda tur. Juptyq synda Qazaqstannyń úzdik tennısshisi Anna Danılına 21-satyda keledi. Jibek Qulambaeva 280-nen 273-orynǵa kóterildi.
Erler reıtınginde Qazaqstannyń birinshi raketkasy Aleksandr Býblık bes saty joǵarylap, 37-orynǵa jaıǵasty. Sondaı-aq Mıhaıl Kýkýshkın de bes satyǵa kóterilip, 161-orynǵa turaqtady. Juptyq reıtıngte Qazaqstan ókilderiniń ishindegi eń úzdigi – Andreı Golýbev. Alaıda ol aldyńǵy aptamen salystyrǵanda birden 14 saty tómen syrǵyp, 41-orynǵa turaqtady. Aleksandr Nedovesov 61-orynǵa, al Grıgorıı Lomakın 239-orynǵa ıe boldy.