Fýtboldan Aýstralııa quramasy bıyl jyl sońynda Qatardyń astanasy – Dohada ótetin fýtboldan álem chempıonatynyń fınaldyq kezeńine joldama aldy.
Azııa qurlyǵynda óner kórsetetin Aýstralııa fýtbolshylary qurlyqaralyq irikteý oıynyn Ońtústik Amerıka ókili Perýmen ótkizip, match sońyndaǵy penaltı serııasynda basym tústi. Sóıtip, álem chempıonatynyń 31-shi joldamasyna ıe boldy. Qatardyń Al-Raıan qalasyndaǵy «Ahmed bın Alı» stadıonynda ótken kezdesýdiń negizgi ýaqyty 0:0 esebimen teń aıaqtalyp, oıyn sońyndaǵy 11 metrlik aıyp dobyn oryndaýda Aýstralııanyń baǵy jandy – 5:4.
Endi álem chempıonatynyń sońǵy joldamasyn taǵy bir qurlyqaralyq irikteý oıynda Kosta-Rıka men Jańa Zelandııa quramalary sarapqa salady. Álem chempıonaty 21 qarasha men 18 jeltoqsan aralyǵynda Qatarda ótedi.