Búgin Soltústik Qazaqstan oblysynyń qurmetti azamaty, maıdanger, ólketanýshy ári jazýshy Sergeı Presnıakov 100 jasqa keldi, dep habarlaıdy Egemen.kz.
Ekinshi dúnıejúzilik soǵystyń ardageri Sergeı Presnıakovtyń mereıtoıyna oraı saltanatty jıyn ótti.
SQO ákimi Qumar Aqsaqalov Memleket basshysy maıdangerge arnaıy joldaǵan alǵys hatyn oqyp, tósbelgisin tabystady.
«Sergeı Mıhaılovıchtiń esimi Soltústik Qazaqstan oblysynyń tarıhyna altyn áriptermen jazylǵan. Sergeı Presnıakov – bizdiń el tarıhyndaǵy kóptegen oqıǵalardyń kýágeri jáne qatysýshysy. Ol Máskeý túbindegi shaıqastarda soǵysyp, 38 atqyshtar brıgadasynda qyzmet etti. Soǵystan keıin partııa organdarynda jumys istedi, ardagerler uıymyn basqardy. О́miriniń kóp bóligin bizdiń aımaqtyń tarıhyn zertteýge arnady. Soltústik Qazaqstan ólketanýynyń damýyna baǵa jetpes úles qosty. Stýdentterge ólketaný jáne týǵan ólke tarıhy kýrstarynan sabaq berdi. Onyń avtorlyǵymen jazylǵan kitaptar arqyly oqyrman el tarıhynan habardar bolady», dedi oblys ákimi.
Sergeı Presnıakov - kóptegen orden-medaldyń ıegeri, «Qurmet belgisi» ordenin qatarynan 4 ret alǵan batyr.
Ol óziniń eńbek jolyn 1939 jyly Omby temirjoly Petropavl stansasynda ekonomıst bolyp bastaǵan. Biraq qaharly soǵys bastalyp, 19 jasar Sergeı Presnıakov maıdanǵa attanýǵa bel býady.
Osylaısha, ol batys, soltústik-batys maıdandary men Máskeý túbindegi shaıqastarǵa qatysady.
Soǵystan keıin ártúrli salada jumys istegen, 10-nan astam kitaptyń avtory.
Aıta ketsek, ol 1980-shi jyldary SQO ardagerler keńesiniń tóraǵasy bolyp, Petropavlda Jeńis saıabaǵyn ashqan edi.