QR Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın Lıýksembýrgtiń Reseı, Belarýs jáne Qazaqstandaǵy elshisi Djordj Fabermen kezdesti. Kezdesý barysynda ǵarysh jáne sıfrlandyrý salasyndaǵy eki eldiń yntymaqtastyq máselesi talqylandy, dep habarlaıdy Egemen.kz.
Jıynda ǵarysh salasyndaǵy yntymaqtastyq máseleleri, sondaı-aq ǵarysh keńistigin beıbit maqsatta zertteý jáne paıdalaný salasyndaǵy ózara túsinistik týraly Memorandýmǵa qol qoıý múmkindigi talqylandy.
Memorandým ǵarysh qyzmeti salasyndaǵy baǵdarlamalar men jobalardy birlesip ázirleý men iske asyrýdy, kadrlar daıarlaý men ǵalymdarmen tájirıbe almasý, sondaı-aq memleketterdiń zańnamalaryn eskere otyryp, derekter men aqparat almasýdy kózdeıdi.
Qazaqstan men Lıýksembýrg ǵarysh keńistigin beıbit maqsatta zertteý, jerdi qashyqtyqtan zondtaý, spýtnıktik baılanys pen navıgasııany damytý, sondaı-aq ǵarysh ınfraqurylymyn paıdalaný jáne ǵarysh apparattary men olarǵa qajetti qural-jabdyqtardy ázirleý salasynda yntymaqtastyq ornatýdy josparlap otyr.
Budan bólek, Qazaqstan Respýblıkasynyń qajettiligine baılanysty O3b mPower spýtnıktik baılanys júıesin qoldaný maqsatynda Lıýksembýrgtiń SES kompanııasymen yntymaqtastyq máseleleri pysyqtalýda. QR aýmaǵynda O3b mPOWER júıesin qoldaný elimizdiń qoldanystaǵy telekommýnıkasııalyq ınfraqurylymyna tolyqtyrý retinde, onyń ishinde Qazaqstannyń aýyldyq eldi mekenderinde ınternet jelisine keń jolaqty qoljetimdilik qyzmetterin usynýdy uıymdastyrý máselesin pysyqtaý sheńberinde qaralady.
Faber myrza búgingi tańda Lıýksembýrgte tehnologııalardy ınnovasııalyq damytý baǵytynda qazaqstandyq kompanııalar úshin qyzyǵýshylyq týdyrýy múmkin jańa ekojúıe qurylyp jatqanyn habarlady.
Kezdesý sońynda Baǵdat Mýsın Djordj Faber men Lıýksembýrg kompanııalaryn osy jyldyń qyrkúıek aıynda Nur-Sultan qalasynda ótetin «Digital Bridge-2022» forýmyna qatysýǵa shaqyrdy.