«Memleket basshysy Ulttyq quryltaı qurý týraly Jarlyqqa qol qoıdy. Qujatta Ulttyq quryltaıdyń erejesi men quramy bekitildi», dep jazdy óziniń áleýmettik jelidegi resmı paraqshalarynda Qazaqstan Respýblıkasynyń Memlekettik keńesshisi Erlan Qarın.
Memlekettik keńesshi jańa qoǵamdyq ınstıtýt músheleriniń qatarynda belgili kompozıtor, jazýshy Ilıa Jaqanov, Qazaqstannyń halyq jazýshysy, aqyn, qoǵam qaıratkeri Muhtar Shahanov, qazaqtyń tuńǵysh ǵaryshkeri, Keńes Odaǵynyń Batyry, Halyq qaharmany Toqtar Áýbákirov, belgili jýrnalıst jáne qoǵam qaıratkeri Seıdahmet Quttyqadam, ǵalym-matematık, akademık Asqar Jumadildaev syndy aıtýly tulǵalar bar ekenin jazady.
Sondaı-aq Ulttyq quryltaıdyń quramyna myqty ekonomıst jáne qoǵam qaıratkeri Jaqsybek Qulekeev, belgili memlekettik jáne saıası qaıratker Álıhan Baımenov, jýrnalıst, medıa-menedjer, qoǵam qaıratkeri Ermurat Bapı, memleket jáne qoǵam qaıratkeri, Parlamenttiń birneshe shaqyrylymynyń depýtaty Nurtaı Sabılıanov, memleket qaıratkeri, álem chempıony, Seýldegi Olımpıadanyń kúmis júldegeri Dáýlet Turlyhanov, bıotehnolog ǵalym, QazVac COVID-19 vaksınasyn ázirleýshi Kúnsulý Zakarııa, qoǵam qaıratkeri, dintanýshy Qaırat Joldybaıuly, belgili tiltanýshy ǵalym Anar Fazyljanova, ekolog, azamattyq belsendi Azamat Ámirtaev jáne basqa da Qazaqstanǵa keńinen tanymal azamattar kirdi. Ulttyq quryltaı quramyna barlyǵy 117 adam múshe boldy.
Erlan Qarınniń aıtýynsha, quramyna árbir óńirlik qoǵamdyq keńesten bir ókilden enýi – Ulttyq quryltaıdyń basty ereksheligi bolyp sanalady. Osylaısha, bul dıalog alańy barlyq jergilikti Qoǵamdyq keńesterdiń túıini ispetti bolyp otyr.
«Sondaı-aq Ulttyq quryltaıǵa Parlament depýtattary, saıası partııalardyń, bıznes, medısına, bilim, ǵylym, mádenıet, sport, adam quqyqtaryn qorǵaý jáne basqa da uıymdasqan áleýmettik toptardyń iri salalyq birlestikteriniń ókilderi kirdi. Quryltaı jumysyna jastar kóshbasshylary men belsendi jas azamattar da shaqyryldy», deıdi E.Qarın.
Qazaqstan Respýblıkasynyń Memlekettik keńesshisi óz jumysyn aıaqtaǵan Ulttyq qoǵamdyq senim keńesi músheleriniń negizi bóligi Ulttyq quryltaı quramyna kirgenin de málimdedi. «Jańa qurylym týraly Prezıdent óziniń naýryz aıyndaǵy Joldaýynda alǵash ret málimdedi.
Al Ulttyq quryltaı ne úshin quryldy?
Ulttyq quryltaı qoǵamdyq toptasýdy nyǵaıtý jáne keńeıtý boıynsha ıdeıalar men qadamdardy izdeý jáne ázirleý úshin dıalogtyq platforma bolýǵa tıis.
Ulttyq quryltaı men Ulttyq qoǵamdyq senim keńesiniń aıyrmashylyǵy nede? Eger Ulttyq qoǵamdyq senim keńesinde talqylaý nysanasy aǵymdaǵy áleýmettik-ekonomıkalyq problemalar, saıası reformalaý máseleleri bolsa, Ulttyq quryltaıda jalpyulttyq qundylyqtar negizinde qoǵamdyq shoǵyrlandyrýdy odan ári damytýǵa qatysty uzaqmerzimdi sıpattaǵy máseleler talqylanatyn bolady.
Ulttyq quryltaı quramy qalaı qalyptasady?
Ulttyq quryltaı – el Prezıdenti janyndaǵy konsýltatıvtik-keńesshi organ. Soǵan sáıkes, onyń quramy boıynsha usynystardy Memleket basshysynyń Ákimshiligi daıyndaıdy. Ulttyq quryltaı otyrystaryna tek Ulttyq quryltaı músheleri ǵana qatysady», deıdi E.Qarın.
Ulttyq quryltaıdaǵy jumys qoǵamdyq negizde júzege asyrylatynyn atap ótken Qazaqstan Respýblıkasynyń Memlekettik keńesshisi quryltaı jumysynda qatysýshylardy rotasııalaý prınsıpi qarastyrylǵanyn da habarlady. «Bul bolashaqta basqa da qoǵam qaıratkerlerin kezeń-kezeńimen tartýǵa múmkindik beredi», deıdi ol.
«Barlyq qazaqstandyqtar óz usynystaryn Ulttyq quryltaı hatshylyǵyna joldaı alatyn arnaıy onlaın platforma qurylǵanyn erekshe atap ótkim keledi.
Osylaısha, Ulttyq quryltaı jańartylǵan Qazaqstannyń qurylysyna óz úlesin qosýǵa daıyn azamattardyń jalpyulttyq birigýiniń ózegi bolady», delingen jazbada.