Chempıondar lıgasynyń jańa maýsymyna qatysatyn Qostanaıdyń «Tobyly» jerebege saı alǵashqy aınalymda Majarstannyń «Ferensvarosh» klýbymen kezdesetin boldy.
Irgetasy 1899 jyly qalanǵan Býdapesht qalasynyń klýby búginge deıin Majarstan chempıonatynda 33 márte top jarǵan. Sondaı-aq 24 márte Majarstan kýbogynda jeńimpaz atanǵan, 6 ret sýperkýbok dodasynda dara shyqqan. 1964 jyldan beri Eýrokýbok básekeleriniń turaqty qatysýshysyna aınalǵan «Ferensvarosh» 1964-1965 jylǵy fýtbol maýsymynda burynǵy Jármeńke kýbogy, qazirgi Eýropa lıgasy týrnırinde jeńimpaz atanǵan. Ázirge bul Majarstan klýbtary arasyndaǵy Eýrokýbokta atoı salǵan jalǵyz komanda.
«Ferensvarosh» qazirgi tańda ÝEFA reıtınginde 101-orynda tursa, «Tobyl» 310-satyǵa jaıǵasqan. Komandany 58 jastaǵy reseılik maman Stanıslav Cherchesov jattyqtyrady. «Tobyl» men «Ferensvarosh» klýbtary arasyndaǵy birinshi aınalymnyń alǵashqy matchy 5 shildede Qostanaıda, qarymta kezdesý 12 shildede Býdapeshtte ótedi.