Toǵyz jasar Márııam Ishanǵalıeva Qurmanǵazy aýdanyndaǵy Kóptoǵaı aýylynda turady. Bıyl 3-synypty úzdik bitirgen. Byltyr «Álemdik model-2021» jáne «Jer sharynyń sýpermodeli – 2021» atalymyn jeńip alǵan edi.
Al «Álemdik model-2022» halyqaralyq talanttar men sulýlyq baıqaýy Reseı Federasııasyndaǵy Sochı qalasynda ótti. Tórt kezeńmen ótken baıqaýǵa álem elderinen 100-den astam úmitker qatysty. Qazaqstannan qatysqan Márııam Ishanǵalıeva birinshi orynǵa qosa «Álemdik model-2022» tıtýlyn jeńip aldy. Jeńimpaz qazaqstandyqqa «Jer sharynyń sulýy-2022» baıqaýyna joldama tabystaldy. Bul baıqaý tamyz aıynda Máskeýde ótedi.
– Márııam qatysýshylardyń kóptigin kórgende, biraz ýaıymdady. Sebebi árqaısysy óz eliniń eń myqty modeli ǵoı. Bıyl Márııam qazaqtyń ulttyq kıimimen sahnaǵa shyqty. Ulttyq kıim Márııamnyń baǵyn jandyrdy. Qazylar alqasynyń músheleri de, fotograftar da Márııamnyń ózine senimdi ekenin joǵary baǵalady, – deıdi anasy Araılym Qarabalaeva.
Endi Márııam Ishanǵalıeva qyrkúıekte Túrkııada ótetin sán aptalyǵyna shaqyrtý aldy. Al qazan aıynda Dýbaıǵa osyndaı aptalyqqa barady.
– Kishkentaı kezinen bıge áýes boldy. Keıin jarnamalyq rolıkterge tústi. Biraq mekteptegi sabaq úlgerimin tómendetken joq. Jyl saıyn úzdikter qatarynan kórinip júr, – deıdi anasy.
Atyraý oblysy