Áńgime barysynda kóshbasshylar Qazaqstan men Reseıdiń saýda-ekonomıkalyq saladaǵy yntymaqtastyǵynyń qazirgi jaǵdaıy men damý perspektıvalaryn jan-jaqty talqylady, dep habarlaıdy Egemen.kz.
Qasym-Jomart Toqaev kúrdeli geosaıası ahýalǵa qaramastan Qazaqstannyń mańyzdy strategııalyq seriktesi – Reseımen aradaǵy yqpaldastyqtyń qarqyndy damyp kele jatqanyn atap ótti.
– Qurmetti Vladımır Vladımırovıch, men Sizdiń osy bedeldi forýmǵa qatysýǵa shaqyrýyńyzdy yqylaspen qabyldadym. Sizdiń baıandamańyzdy muqııat tyńdadym. Mazmuny men kólemi jaǵynan bul baıandamańyz halyqqa arnalǵan tutas joldaýǵa teń keledi. Aýdıtorııa muny óte jyly qabyldady. Buǵan pikir bildirýshiler de az bolmaıdy dep oılaımyn. Ekijaqty yntymaqtastyqqa keler bolsaq, alańdaýshylyqqa negiz joq. Bári qalypty jaǵdaıda. О́nerkásip, aýyl sharýashylyǵy salalary boıynsha naqty jobalar júzege asyrylyp jatyr. Investısııalyq yntymaqtastyq qarqyndy damyp keledi. Bıyl erekshe jyl – dıplomatııalyq qatynastarymyzǵa 30 jyl. Ekijaqty yntymaqtastyqty damytý turǵysynan eleýli jetistikterge qol jetkizdik. Bul baǵyttaǵy qarym-qatynastarymyz odan ári qarqyndy damı beredi dep oılaımyn, – dedi Memleket basshysy.
О́z kezeginde Reseı Prezıdenti eki el arasyndaǵy saýda-ekonomıkalyq baılanystar odan ári nyǵaıa beretinin aıtty.
– Peterbýrg ekonomıkalyq forýmyna kelgenińiz úshin kóp rahmet. Biz úshin elderimiz arasyndaǵy erekshe qatynastardy atap ótý jáne ózińizben negizgi baǵyttar jóninde, ásirese ekonomıka salasy boıynsha pikir almasý mańyzdy. Jańa ǵana forým aıasynda osyny aıttyq. Aıtpaqshy, osy forýmda 7 mıllıard dep qate aıtyppyn. Qazaqstan ekonomıkasyna salynǵan ınvestısııa 17 mıllıard dollar. Taýar aınalymy artyp keledi. Siz jańa ǵana bul týraly aıtyp óttińiz. Byltyr osy kórsetkish 25 mıllıard dollar bolsa, bıyl alǵashqy úsh aıda 12 mıllıardtan asqan. Eger osyndaı qarqynmen damı berse, rekordtyq kórsetkishke qol jetkizemiz. Bıyl elderimiz arasyndaǵy dıplomatııalyq qatynastardyń ornaǵanyna 30 jyl. Aldymyzda óńirlik forým bar. Jalpy úkimetterimiz belsendi jumys júrgizip jatyr, – dedi Vladımır Pýtın.