Elordada Sırııa jónindegi Astana prosesiniń 18-shi kezdesýi ótti. Kezdesý eki kúnge sozylyp, nátıjesinde, kepilger-memleketter – Reseı, Túrkııa jáne Iran birlesken málimdeme jasady. Atalǵan eldermen qatar, is-sharaǵa Sırııa úkimeti men sırııalyq oppozısııa ókilderi qatysty.
Kepilger elder jabyq kelissóz júrgizdi. Elimizdiń Syrtqy ister mınıstrliginiń baspasóz ortalyǵy habarlaǵandaı, taraptar Sırııadaǵy jaǵdaıdy, onyń ishinde gýmanıtarlyq jáne áleýmettik-ekonomıkalyq ahýal, Jenevadaǵy sırııalyq konstıtýsııalyq komıtet jumysynyń jandaný perspektıvalary, taraptar arasyndaǵy senimdi nyǵaıtý, kepilge alynǵandardy bosatý jáne iz-túzsiz joǵalǵandardy izdeý máselelerin talqylaǵan. Kelissóz qorytyndysy boıynsha Iran, Reseı jáne Túrkııa birlesken málimdeme jasady. Onda taraptar Sırııa Arab Respýblıkasynyń egemendigine, birligi men aýmaqtyq tutastyǵyna, sondaı-aq BUU Jarǵysynyń maqsattary men qaǵıdattaryna ózderiniń turaqty túrde berilgendikterin qýattady jáne bul prınsıpter jalpyǵa birdeı saqtalýy jáne qurmettelýge tıis ekenin atap ótti.
Sonymen qatar kepilger-elder Sırııanyń ártúrli aımaqtaryndaǵy lańkestik árekettiń barlyq túrin aıyptady. «DAISh, «Djabhat an-Nýsra» jáne «Ál-Kaıda» nemese DAISh-pen baılanysty barlyq tulǵany, topty, kásiporyn men uıymdy jáne BUU Qaýipsizdik Keńesi osyndaı dep tanyǵan basqa da lańkestik toptardy túpkilikti joıý maqsatynda odan ári yntymaqtastyqtyń qajettigin qýattady. Idlıb deeskalasııa aımaǵynda (IDZ) jáne odan tys jerlerde beıbit turǵyndarǵa qaýip tóndiretin, BUU Qaýipsizdik Keńesi moıyndaǵan «Haıat Tahrır Ash-Sham» tobynyń jáne onymen baılanysy bar basqa da terrorıstik uıymdardyń bolýy men lańkestik áreketi bizdi alańdatyp otyr. Osyǵan oraı biz Idlıb deeskalasııa aımaǵyndaǵy jaǵdaıdy jiti qarastyryp, gýmanıtarlyq jaǵdaıdy turaqty qalypqa keltirý úshin odan ári kúsh salýǵa kelistik. Idlıb boıynsha barlyq qoldanystaǵy kelisimderdi tolyq oryndaý arqyly «jerdegi» tynyshtyqty saqtaý qajettigin atap óttik», dep kórsetti málimdemesinde taraptar.
Sondaı-aq kepilger-elder halyqaralyq quqyq pen halyqaralyq gýmanıtarlyq quqyqqa, Sırııa men kórshiles elderdiń egemendigine qaıshy keletin, aımaqtaǵy turaqtylyq pen qaýipsizdikke qaýip tóndiretin Izraıldiń Sırııada jalǵasyp jatqan áskerı shabýyldaryn aıyptap, olardy toqtatýǵa shaqyrdy. Málimdemede Izraıldiń Sırııa aýmaǵyndaǵy agressııany búrkemeleý retinde azamattyq ushaqtardy paıdalanýy halyqaralyq erejelerdi óreskel buzý jáne beıbit turǵyndardyń ómirine qaýip tóndiretini aıtylǵan.
Kelissózder aldaǵy ýaqytta da Qazaqstanda jalǵasady. «Astana prosesiniń 19-kezdesýi osy jyldyń ekinshi jartysynda elordada ótedi», dep málimdedi Qazaqstan Syrtqy ister mınıstriniń orynbasary Ádil Tursynov.
Astana prosesiniń 18-kezdesýine RF Prezıdentiniń Sırııa jónindegi arnaıy ókili Aleksandr Lavrentev, Túrkııa delegasııasy SIM Kópjaqty departamentiniń bas dırektory Seldjýk Ýnal, Iran delegasııasy SIM saıası máseleler jónindegi aǵa kómekshisi Alı Asgar Hadjı qatysty. Sondaı-aq BUU Bas hatshysynyń Sırııa jónindegi Arnaıy ókili keńsesiniń saıası máseleler jónindegi bas qyzmetkeri Robert Dann, Iordanııa delegasııasy, BUU Bosqyndar isteri jónindegi Joǵarǵy komıssary basqarmasynyń jáne Halyqaralyq Qyzyl Krest komıtetiniń ókilderi baqylaýshylar retinde keldi.
Nur-Sultandaǵy kelissózderdiń júrgizilýi halyqaralyq qoǵamdastyq tarapynan qoldaý taýyp otyr. О́ıtkeni «Astana prosesi alǵash ret Sırııa úkimeti men qarýly oppozısııa ókilderin bir-birimen betpe-bet otyrǵyzyp, tildestirdi. Búginde el uıymdastyrǵan is-shara Sırııadaǵy qaqtyǵystardy tolyqtaı toqtatyp tastamasa da, kelissózder arqyly ýshyqqan jaǵdaıdy birshama jeńildetti», deıdi sarapshylar. «Bizge Astana prosesiniń qaı elde, qaı jerde ótetini mańyzdy emes, máselen Astana prosesiniń birqatar raýndy el aýmaǵynda ótken joq. Sochı, Ankarada uıymdastyryldy. Bul jerde bizge mańyzdysy ydyrap, keregesi sógilgen Sırııaǵa kómek berý, ondaǵy qaqtyǵystardy aýyzdyqtap, halqyna bolashaqta beıbit ómir syılaý jolyndaǵy máselelerdi sheshýge túrtki bolý», dedi Qazaqstan strategııalyq zertteýler ınstıtýty dırektorynyń orynbasary Sanat Kóshkinbaev.