Ýkraına prezıdenti Volodımır Zelenskıı ótken demalys kúnderi ońtústiktegi Nıkolaev qalasyna bardy. Sapar barysynda el basshysy shahar ákimshiliginiń ǵımaratyn kórip qaıtqan. Sondaı-aq jergilikti aýrýhanaǵa da at basyn burǵan kórinedi.
О́zderińizge málim, Nıkolaev qalasy Ýkraınanyń ońtústiginde ornalasqan. Oǵan taıaý mańdaǵy Herson qalasyn Reseı áskerleri basyp alǵan bolatyn. Al ákimshilik ǵımaratqa zymyrannan jasalǵan shabýyl saldarynan zalal kelgen edi.
«Bizdiń Nıkolaev oblysy. О́ńirdegi mańyzdy máseleler boıynsha keńes ótti. Biz ekonomıkanyń jaı-kúıin, sýmen qamtamasyz etýdi qalpyna keltirýdi, aýyl sharýashylyǵyndaǵy jaǵdaıdy talqyladyq. Qurlyqtan jáne teńizden keletin qaýipterge erekshe nazar aýdardyq. Ýkraınanyń jeńisi úshin jumysty toqtatpaımyz», delingen Zelenskııdiń Telegram arnasynda.
Sondaı-aq Volodımır Zelenskıı kútpegen jerden Odessa oblysyna da bardy. Buǵan deıin bul sapar týraly eshteńe aıtylmaǵan edi. Sondyqtan kópshilik úshin Zelenskııdiń bul áreketi tosyn boldy. Ýkraına prezıdenti baspasóz qyzmetiniń habarlaýynsha, ol Ishki ister mınıstrligi bólimsheleriniń bekinisin, qarý-jaraǵyn jáne atys tırin aralap, shekarashylarǵa marapattar tapsyrǵan.
Aıta keterligi, áskerı qaqtyǵys bastalǵaly V.Zelenskıı el aýmaǵyn jıi aralap júr. Kıev mańynan Reseı áskeri ketkennen keıin birneshe ret saparǵa shyqty. Áýeli Harkovqa bardy. Sodan keıin Zaporoje oblysyna at basyn burdy. Tipti Donbasqa da baryp, alǵy sheptiń jaı-kúıimen tanysyp qaıtty.
Lıtva bıligi Reseıdiń Kalınıngrad oblysynan negizgi aýmaqqa ótetin júk poıyzdarynyń ótýine tyıym saldy. Bul týraly alǵash bolyp oblystyń gýbernatory habarlaǵan-dy. Lıtvanyń mundaı qadamǵa barýyna Eýropalyq odaqtyń salǵan sanksııasy áser etip otyr.
Tyıym salynǵan taýarlar jalpy júk aǵynynyń jartysyna jýyǵyn quraıdy. Sonyń ishinde kómir, metall jáne qurylys materıaldary bar. О́tken aptada Lıtvanyń bir top depýtaty Ýkraınanyń qoımalarynan tonalǵan astyq el aýmaǵy arqyly da tasymaldanýy múmkin ekenine alańdaýshylyq bildirgen edi.
Ýkraınadaǵy áskerı qaqtyǵys bastalǵaly beri jeti jarym mıllıonnan astam adam elden ketken. Bul Birikken Ulttar Uıymynyń Bosqyndar isi jónindegi Joǵarǵy Komıssary basqarmasy málimdedi. BUU keltirgen derekterge súıensek, 24 aqpanda Reseı basyp kirgeli elden ketken 7,5 mıllıonnan astam ýkraınalyqtyń 2,5 mıllıony ǵana oralǵan.
Al Ýkraınanyń ózinde 7,1 mıllıon adam el ishinde bosqynǵa aınalyp, baspanasyn tastap ketken. Sondaı-aq 15,7 mıllıon adam shuǵyl gýmanıtarlyq kómekke zárý. BUU Bosqyndar isi jónindegi Joǵarǵy Komıssary Eýropada 5,1 mıllıonnan astam ýkraındyq bosqyn bar ekenin alǵa tartady. Uıym qazirgi bosqyndar daǵdarysyn Ekinshi dúnıejúzilik soǵystan keıingi eń úlken daǵdarys dep baǵalap otyr.
Budan bólek 323 bala qaza taýyp, 583-ten astamy jaraqat alǵan. Mundaı derekti Ýkraına Bas prokýratýrasy keltirdi. Biraq soǵys áli aıaqtalmaǵanyn, Ýkraınanyń biraz aýmaǵyn Reseı basyp alǵanyn eskersek, zardap shekken balalar sany budan da kóp bolýy yqtımal. О́ıtkeni ol óńirde sanaq júrgizý múmkin emes.
Balalardyń kópshiligi Donesk, Harkov, Kıev, Chernıgov, Lýgansk, Herson, Nıkolaev, Zaporoje jáne Sýmy oblystarynda zardap shekken. 2028-den astam oqý ornyna bombalaý men atqylaýdan túrli deńgeıde zalal kelgen. Sonyń 209-y tolyǵymen qıraǵan. BUU málimeti boıynsha, Reseı agressııasy saldarynan 4 509 beıbit turǵyn, onyń ishinde 294 bala qaza tapty. BUU sondaı-aq qaza tapqandar men jaralanǵandar áldeqaıda kóp ekenin alǵa tartady. Uıym tek tirkelgen, qujaty bar resmı málimetti ǵana taratady.