Elordada Balalar jylyna oraı ótkizilgen FAMILY STEAM CHALLENGE-2022 otbasylyq saıysynyń fınaldyq kezeńi qorytyndylandy. Baıqaýdy «Senimen bolashaq» respýblıkalyq qoǵamdyq birlestigi Aqparat jáne qoǵamdyq damý mınıstrliginiń qoldaýymen STEAM LAB kompanııasymen birlesip uıymdastyrdy.
Fınalǵa deıin irikteý kezeńi ótken, mamyr aıynyń 10-y men 30-y aralyǵynda onlaın rejimdegi irikteý synyna respýblıka boıynsha 444 otbasy tirkeldi. Alǵashqy kezeńde qatysýshylar saıystyń shartyna sáıkes qoljetimdi materıaldardan STEAM LAB kompanııasy kórsetken jobany (gıdravlıkalyq kran) ázirleý barysyn beınerolıkke túsirip, ınstagram paraqshalaryna júktedi. Arnaıy komıssııa ár beınerolıkti qarap, jumystyń sapasyna, ýaqytyna, ata-ana men bala arasyndaǵy qarym-qatynasqa qaraı baǵalady. Nátıjesinde, ár óńirden úzdik dep tanylǵan 16 joba ekinshi fınalǵa joldama aldy. Birinshi kezeń jeńimpazdaryna «Senimen bolashaq» RQB 100 myń teńge kóleminde aqshalaı syılyqtar tabystady.
Jarysqa qatysýshylar fınalda 150 dana aǵash tıaqshalardy ystyq jelimmen biriktire otyryp, 90 mınýt ishinde myqty kópir qurastyryp shyǵýdan baq synasty. Munda otbasy músheleriniń uıymshyldyǵy, bir-birin qoldaýy úlken ról oınady. Baıqaýdy uıymdastyrǵan birlestiktiń tóraǵasy Raqymbek Qýatbekuly atalǵan is-shara balalardyń kanıkýldaǵy bos ýaqytyn paıdaly ári qyzyqty ótkizý maqsatynda uıymdastyrylǵanyn aıtady.
«Bul baıqaý osynaý ataýly jylda balalardy qoldaý, eńbekke baýlý, olarǵa ulttyq qundylyqtardy nasıhattaý, jas urpaqtyń tehnıkalyq ǵylymdarǵa degen súıispenshiligin, ómirge qulshynysyn arttyrý maqsatynda uıymdastyryldy. Saıys arqyly oqýshylardyń kanıkýldaǵy ýaqytyn paıdaly ári qyzyqty ótkizýge, otbasy músheleriniń arasyndaǵy jaqsy qarym-qatynasty nyǵaıtýǵa atsalysýdy kózdedik. STEAM tehnologııasy elimizge birneshe jyl buryn kelse de, osy týraly ata-analar kóp bile bermeıdi. Sonyń paıdasyn, qoljetimdi nárselerden, tipti turmystaǵy qajetsiz zattardan da tanymdyq, qajetti dúnıe jasaýǵa bolatynyn kórsetkimiz keldi», deıdi R.Qýatbekuly.
Otbasylyq saıys qorytyndysy boıynsha Atyraý oblysynan kelgen Merýert Otasheva men qyzy Ádemi Jumabaı birinshi orynǵa jáne 500 myń teńge syıaqyǵa ıe boldy. Al Nur-Sultan qalasynan qatysqan Saltanat Ýmasheva men balasy Islam Keremhanǵa ekinshi oryn men 300 myń teńge buıyrsa, Shymkent qalasynan kelgen Serik Aıtýarov pen qyzy Káýsar Álipbek 200 myń teńge aqshalaı syılyqpen 3 orynǵa turaqtady.
Birinshi oryn ıelengen atyraýlyq Merýert Otasheva: «Qazir tehnıka men tehnologııa sanamyzdy turmysymyzdy jaýlap alǵan zaman bolyp tur. Telefonǵa telmirgen bala ata-anasynan ajyrap ketedi. Al osyndaı saıys ata-ana men balanyń arasyn jaqyndata túsedi eken. Soǵan kózimiz jetti. Sondyqtan mundaı baıqaýlar kóp bolǵanyn qalaımyn», deıdi.