Qarýly Kúshterdegi áskerı bólimderde jas sarbazdar Otan aldynda adal qyzmet etýge ant berdi. Áýe shabýylyna qarsy qorǵanys áskerlerinde ant berý rásimi olardyń qurylǵanyna 30 jyl tolýymen tuspa-tus keldi.
Jalpy, áskerı daıyndyq kýrsynan jáne ant qabyldaǵannan keıin jas býyndar eldiń áýe shepterin qorǵaýǵa qajetti áskerı-eseptik mamandyqtardy ıgerýge kirisedi. Sondaı-aq Ulttyq qorǵanys ýnıversıtetiniń biregeı bólimsheleriniń biri bolyp sanalatyn áskerı-ǵylymı vzvodynyń merzimdi qyzmettegi áskerı qyzmetshileri de Otanǵa adal bolýǵa ant berdi. Olardyń negizgi mindeti – ınjenerlik-tehnıkalyq beıindegi, IT-tehnologııalar men kıberqaýipsizdik baǵyttary boıynsha ǵylymı jumys atqarý.
Áskerı-ǵylymı vzvodtyń áskerı qyzmetshileri ózderiniń kúndelikti qyzmetinde jaýyngerlik daıarlyqtyń negizgi pánderin ıgerýden basqa Qarýly Kúshterdiń ıgiligi úshin ǵylymı-zertteý, tájirıbelik-konstrýktorlyq jáne synaq jumystaryn oryndaýǵa tartylatyn bolady.
– Elimizdiń jetekshi áskerı joǵary oqý orny – Ulttyq qorǵanys ýnıversıtetine qyzmet etýge kelgenimdi maqtan tutamyn jáne Otan aldyndaǵy Konstıtýsııalyq paryzymdy laıyqty oryndaý úshin bar kúsh-jigerimdi salamyn. Bul úshin meniń áskerge barar al- dynda alǵan ǵylymı-tehnıkalyq baǵyttaǵy tájirıbem men bilimim bar, – dedi qatardaǵy jaýynger Artem Egorov.
Saltanatty is-sharaǵa Qarýly Kúshterdiń ardagerleri, ınternasıonalıst-jaýyngerler, sarbazdardyń týǵan-týystary qatysty.
Ant qabyldaǵannan keıin dástúr boıynsha bólimshe komandırleri ata-analarymen áńgimelesýler ótkizdi. Qyzyqtyrǵan suraqtaryna jaýap berip, olardy áskerı bólimderdiń ınfraqurylymymen tanystyrdy, kazarmalar, ashanalar men oqý synyptaryn kórsetti.