Túrkistanda bıyl ekinshi ret uıymdastyrylǵan respýblıkalyq «Túrkistan daýysy» án baıqaýy óz máresine jetti. Elimizdiń ár óńirinen kelgen jas ánshiler Qazaqstan kompozıtorlarynyń jáne ózi tańdaǵan shyǵarmany vokaldy-aspaptyq ansambl súıemeldeýimen oryndap shyqty.
Shyǵarmashyl daryndy jastarǵa qoldaý kórsetý, qazaq mýzykasyn nasıhattaý maqsatyndaǵy baıqaýdyń irikteý kezeńinde 52 úmitker onlaın formatta ótinim bildirip, onyń 17-si uıymdastyrý komıtetiniń sheshimimen aqtyq kezeńge joldama alǵan. Daryndar arasynda jeńimpazdy anyqtaý qazylar alqasyna da ońaıǵa soqpady. Bul oraıda qazylar alqasynyń tóraǵasy, Qazaqstannyń eńbek sińirgen qaıratkeri, ánshi, kompozıtor Medeý Arynbaev qatysýshylar daıyndyǵynyń joǵary deńgeıde bolǵanyn, olardyń án tańdaýy, daýys tehnıkasy, sahna sheberlikteri men jaýapkershilikteri myqty ekendigin atap ótti. Al tanymal kompozıtor Beıbit Oraluly: «Maǵan respýblıkalyq baıqaý unady. Qatysýshylardyń deni án aıtýdyń naǵyz sheberleri deýge bolady. Olar tipti halyqaralyq baıqaýlarǵa da tájirıbeleri jetetin kásibı mýzykanttar ekendigin dáleldeı tústi», dedi.
Sonymen, Almaty oblysynyń qatysýshysy Almagúl Battalıeva bas júlde ıegeri atansa, 1-orynǵa Dıdar Abdýhalyq (Shymkent qalasy), Bahtııar Aqylbek (Aqtóbe oblysy) laıyq dep tanyldy. Al 2-oryndy Tolǵanaı Pazylaqyn (Almaty qalasy) men Arqas Aıdarbek (Batys Qazaqstan oblysy) ıemdense, 3-oryn Elvıra Nýrgýjına (Nur-Sultan qalasy) men Asyl Jomartovqa (Mańǵystaý oblysy) jáne Ernar Amandyqqa (Qyzylorda oblysy) buıyrdy. Al Nazrın Musa (Qaraǵandy oblysy) men Janasyl Elýbaev (Ulytaý oblysy) jáne Aıdana Rıza (Qostanaı oblysy) baıqaý dıplomanttary atandy. Jeńimpazdarǵa Gran-prı kýbogynan bólek, arnaıy júldeler men dıplomdar, baǵaly syılyqtar tabystaldy.
TÚRKISTAN