23 maýsym kúni saǵat 12:00-de Nur-Sultan qalasynda Trıatlon saıabaǵynda Halyqaralyq Olımpıada kúnine arnalǵan sporttyq merekelik shara ótedi, dep habarlaıdy Egemen.kz.
Elorda turǵyndary men qonaqtary estafetalyq jarystar, 3h3 basketbol, tekbol jáne ústel tennısi oıyndary, sondaı-aq breık-dansshylardyń ónerine tánti bolady jáne ártúrli jastaǵy balalar arasynda dzıýdo men taekvondodan kórsetilim jekpe-jegi uıymdastyrylatyn sharaǵa qatysa alady.
Sonymen qatar, Ulttyq qurama músheleri men Qazaqstannyń ataqty sportshylary elordanyń jas turǵyndaryna sheberlik sabaǵyn ótkizedi. Atap aıtsaq, bokstan 2012 jylǵy London Olımpıadasynyń chempıony Serik Sápıev, áıelder kúresinen úsh dúrkin Olımpıada júldegeri Gıýzel Manıýrova, short-trekshi, 2022 jylǵy Beıjiń Olımpıadasynda Qazaqstan quramasynyń kapıtany Abzal Ájǵalıev, konkımen júgirýden tórt qurlyqtyń chempıony Ekaterına Aıdova, bokstan álemdik básekeler jeńimpazdary aǵaıyndy Aıbek pen Nurbek Oralbaı jáne kúresten 2022 jylǵy Azııa chempıondary Mádına men Jámıla Baqbergenovter jas sportshylarmen kezdesip, tájirıbesimen bólisedi.
Barlyq qatysýshylar sporttyq sharalar men jarystarǵa qatysyp, vıktorınada suraqtarǵa jaýap bere otyryp, QR Ulttyq Olımpıadalyq komıtetiniń estelik syılyqtaryn utyp alýǵa múmkindik alady.
Sonymen qatar, bıylǵy jyly Ulttyq Olımpıadalyq komıteti maýsym aıy boıyna dástúrge aınalǵan aksııalardy ótkizedi. Bes olımpıada saqınasy bes qurlyqty beıneleıtinindeı, qazaqstandyqtardyń sporttaǵy birligin bildiretin merekelik estafetany Qazaqstannyń bes oblysy alyp ótedi. Atap aıtqanda, elimizdiń jańa oblys ortalyqtarynda Túrkistan (Túrkistan oblysy), Semeı (Abaı oblysy), Jezqazǵan (Ulytaý oblysy), Qonaev (Almaty oblysy) qalalarynda aýqymdy sport festıvalderi ótedi.
Bıyl elimizde Olımpıada kúni 29-shy ret toılanady.