Otandyq kásiporyn mal dárisin shyǵarýǵa daıyn

Prezıdent janyndaǵy Ortalyq kommýnıkasııalar qyzmetinde dástúrli brıfıng óz jalǵasyn tapty. Basqosýdyń bul jolǵy qonaqtary Ulttyq kásipkerler palatasynyń agroónerkásiptik kesheni komıtetiniń hatshysy Baýyrjan Qasenov, osy komıtettiń sarapshysy Bolat Seısenov jáne «Astana Fınans» «Lızıngtik kompanııasy» AQ basqarma tóraǵasynyń orynbasary Erbol Ýathanov boldy. «Elimizge veterınarlyq dári-dár­mekterdiń 95 paıyzy shetelden jetkiziledi. Bul óndiristerdi respýblıkada qolǵa alý úshin memlekettik satyp alý arqyly suranysty kóbeıtý qajet. Qazirgi tańda Stepnogor jáne Taraz qalalaryndaǵy eki kásiporyn maldyń aýsyl, qutyrý aýrýlarynan emdeýge, sonymen qatar túrli bakterııalarǵa qarsy dári shyǵarýǵa daıyn. Tipti qoldaý bildiretin ınvestorlar da bar. Endi tek ónimge suranys bildirip, ótkizetin naryqty anyqtaý lázim», deıdi Ulttyq kásipkerler palatasy agroónerkásip kesheni komıtetiniń sarapshysy Bolat Seısenov. Sondaı-aq, ol veterınarlyq dári-dármektermen elimizdi qamtamasyz etý úshin biz búginde ımportqa táýeldi bolyp otyrǵanymyzdy da nazardan tys qaldyrmady. «Buryndary búkil Keńes odaǵyn keıbir qajetti preparattarmen Almaty bıokombınaty qamtamasyz etetin. Keıinderi ol jabylyp qaldy. Bul rette ulttyq palataǵa ınvestorlar kelip, óndiris ornyn ashaıyq dep usynys bildirýde. Bizge endi suranysty qamtamasyz etý ǵana qaldy», dedi ol. Keıingi eki jylda mal sharýashyly­ǵy­men aınalysatyn qojalyqtardyń sany 14 paıyzǵa kóbeıgen. О́tken jyly Keden odaǵy aıasynda Máskeýge myń tonnaǵa jýyq et ónimi jetkizilse, bıyl onyń kólemi on bes myń tonna bolady dep josparlanǵan. Osy turǵyda mamandar ıntegrasııalyq úrdister septigin tıgizgenin aıtady. «Elimizde maldyń 70-80 paıyzy qolaıly jaǵdaıda ustalyp otyrǵan joq. Sondyqtan biz «Sybaǵa» baǵdarlamasy aıasynda sharýa qojalyqtaryna qoldaý kórsetip, maldy asyldandyrý sekildi jumystarǵa kóńil aýdarýdamyz. Osylaısha Otanymyzdaǵy et, sút óndirisi qazir 20 paıyzdy qurasa, aldaǵy 5-6 jylda 70 paıyzǵa jaqyndaıdy dep josparlaýdamyz», deıdi Ulttyq kásipkerler palatasy agroónerkásip kesheniniń hatshysy Baýyrjan Qasenov. Ábdirahman QYDYRBEK, «Egemen Qazaqstan».