Memleket basshysy Qasym-Jomart Toqaev Ulttyq quryltaı qurý máselesin Qazaqstan halqyna arnaǵan Joldaýynda aıtqan bolatyn. Prezıdent bastamasynan bastaý alǵan Ulttyq quryltaı jańadan qurylǵan Ulytaý oblysynda, qazaq tarıhynda aıryqsha orny bar ult uıasy Ulytaýda joǵary deńgeıde ótti.
Osynaý alqaly basqosýdy barshamyz asyǵa kútkenimiz belgili. Olardyń qatarynda úkimettik emes uıym ókilderi de bar. Bir anyǵy, Ulttyq quryltaı qazaqstandyq qoǵamdy uıystyratyn ortalyqqa aınalǵanyn jan júregimizben sezindik.
Qasym-Jomart Toqaev alqaly basqosýda jalpyulttyq birlikti nyǵaıtý týrasyndaǵy tolǵamdy oılaryn ortaǵa saldy.
«Demokratııa degenimiz – keremet ómir týraly jalpylama uǵym, túsinik emes. Bul – kúndelikti tynymsyz eńbekti talap etetin órkenıetti ómir salty. Ataqqumarlar men alaıaqtardyń jalań urany men qurǵaq ýádesine aldanbaý qajet. Elimizdiń bolashaǵy úshin asa mańyzdy máselelerdi daý-damaımen emes, utymdy oı-pikirmen, parasatty paıymmen jáne sanaly kózqaraspen sheshkenimiz abzal. Biz «túrli kózqaras, birtutas ult» qaǵıdatyn berik ustanýymyz qajet. Bir-birimizdiń oı-pikirimizdi tyńdap, qurmetteı bilsek, alǵa qadam basamyz» degen Prezıdent sózi barshamyzdyń kóńilimizge qondy.
Ulttyq quryltaıdyń alǵashqy otyrysyna qatysa almaǵan talaı azamat óz oılaryn aıtyp jatyr. Aldaǵy ýaqytta olar da rotasııa erejesine sáıkes kelesi basqosýlarda boı kórsetýi ábden múmkin. Munyń barlyǵy da kezeń-kezeńimen iske asyrylatyn qadamdar ekenine eshqandaı kúmánim joq.
Ulttyq quryltaıda sóz alǵan belgili ǵalym Asqar Jumadildaevtyń kókeıkesti oılary júregime jetti. Akademıktiń bilim men ǵylymdy órkendetý týraly aıtqan oılary ózekti ekenine eshqandaı talasym joq.
«Sóz ben istiń úılesimi, ádeptilik, jańa umtylys. Osy úshtaǵan qaperde turǵany jón. «Jańa Qazaqstan quramyz» degen uǵym durys boldy. Biraq meniń pikirimshe, «Jańa Qazaqstan» degen sóz «Eski Qazaqstandy» teristeý degen sóz emes.
«Eski Qazaqstanda» da jańa nárseler kóp bolǵan. Sonyń jaqsysyn alyp, jańa sıpat berip, sol halyqtyń ıgiligine jumsaý kerek», degen ǵalymnyń pikiri qoldaýǵa ábden laıyq ekeni talas týdyrmasa kerek.
Halyq zor úmit artqan ulttyq quryltaıdyń jalpyhalyqtyq platformaǵa aınalatyny da qýantyp otyr. Memleket basshysy osylaısha syndarly dıalog alańyn ornatty.
Alqaly basqosýǵa qazaqtyń qaımaqtary qatysqany málim. Alashtyń ardaqty aqyny Svetqalı Nurjannyń sózi de jigerimizdi janyǵany daýsyz. Kókeıdegi kóp oıdy qozǵaǵan aqynǵa aıtar alǵys zor. Sondaı-aq kúlli qazaq halqy qadirleıtin belgili aqyn, kúresker tulǵa Muhtar Shahanovtyń Prezıdent qolynan Qazaqstannyń Eńbek Eri ataǵyn alǵany óte durys sheshim boldy. Mundaı qadamnyń barlyǵy da bizdi qýantty. Joǵaryda aıtqanymdaı, elimizdiń kez kelgen azamatyna dıalogqa qatysýǵa, óz usynystaryn engizýge, óz ıdeıalaryn aıtýǵa múmkindik beretin Qurultay mobıldi qosymshasyn qurýdy usynǵany da durys qadam ekeni ras.
Ulttyq quryltaı burynǵy dala demokratııasynyń jalǵasyna aınaldy. Aldaǵy otyrystarda da eldiń kókeıindegi máseleler qozǵalyp, olardyń sheshim tabýyna muryndyq bolar bastamalarmen jalǵasyn tabady degen senim mol.
Baný NURǴAZIEVA,
Qazaqstan Azamattyq alıansynyń prezıdenti