Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın jumys saparymen Pavlodar oblysynda boldy. Sońǵy ýaqytta óńirde IT salasy qarqyndy damyp kele jatqanyn eskersek, mınıstr kadr daıarlaý isine basymdyq berýdi tapsyrdy.
Eń áýeli mınıstr mamandandyrylǵan oblys ortalyǵyndaǵy Halyqqa qyzmet kórsetý ortalyǵynda azamattardy qabyldady. Shahar turǵyndary kórsetiletin qyzmetterdiń sapasy jóninde áńgime órbitip, ortalyqtyń jumysyna kóńilderi tolatyndaryn jetkizdi. Onlaın formatqa kóshý nátıjesinde, memlekettik qyzmetterdi alýdaǵy jedeldik pen qolaılylyqtyń aıtarlyqtaı artqanyn atap ótti.
Deıturǵanmen, turǵyndar keıbir máseleler áli de bıýrokratııalandyrylǵanyn jáne mınıstrlik tarapynan nazar aýdarýdy talap etetindigin aıtty. Azamattardyń saýaldaryna jaýap bere otyryp, mınıstr jaqyn arada Ekibastuzda mamandandyrylǵan HQO ashylatynyn súıinshiledi. Endigi jerde qala men aýdan turǵyndaryna kólik quraldaryn resimdeý úshin oblys ortalyǵyna barýdyń qajeti bola qoımas.
Toraıǵyrov ýnıversıtetinde jurtshylyqpen kezdesý barysynda B.Mýsın vedomstvonyń memlekettik qyzmet kórsetý, oblysty qoljetimdi ınternetpen jáne baılanyspen qamtamasyz etý, ǵaryshtyq monıtorıng baǵytynda júrgizilip jatqan jumystardyń jobalary men jetistikteri týraly aıtty.
Vedomstvo basshysy qazirgi tańda qazaqstandyqtarǵa onlaın formatta 18 negizgi qujat qoljetimdi ekenin aıtty. Olardyń ishinde jeke kýálik, júrgizýshi kýáligi, neke jáne týý týraly kýálikter jáne taǵy basqalary bar. Sonymen qatar B.Mýsın memlekettik qyzmetterdi proaktıvti túrde kórsetýge, bul jańashyldyq bolashaqta adamı faktordan múldem bas tartýǵa baǵyttalǵanyn atap ótti.
– Biz memlekettik qyzmetterdi usyný prosesinen adamı faktordy alyp tastaý maqsatyn qoıyp otyrmyz. Jeke kýálikti alýǵa jáne ony qaıta shyǵarýǵa arnalǵan «qujattandyrý termınaly» sııaqty jobalardy iske asyrý jospary bar. Qazirgi ýaqytta bul joba Nur-Sultan qalasynyń birqatar HQO-synda ornatylýda. Bul qadam turǵyndarǵa kóshi-qon qyzmetiniń qyzmetkerine júginbeı, 5-10 mınýt ishinde jeke kýálikke tapsyrys berýge múmkindik beredi, – dedi B.Mýsın.
Mınıstr búginde Pavlodar oblysy halqynyń 98 paıyzy, ıaǵnı 758 myń adam ınternet jáne baılanys qyzmetterimen qamtamasyz etilgenin atap ótti. Qalǵan 2 paıyzy jaqyn arada qosylady.
Taǵy bir mańyzdy másele – jaıylymdyq jerlerdiń jaı-kúıin spýtnıkten baǵalaý. Sonyń nátıjesinde, oblysta 1,8 mln ga jaıylymdyq jerdi zańsyz basyp alý jaǵdaılary áshkere bolǵan.
Orman resýrstaryna jasalǵan kosmomonıtorıng derekterine sáıkes, 731 aǵash kesý polıgony anyqtalypty. Pavlodar oblysynyń memlekettik orman qory aýmaǵynda 144 qurylys sıfrlandyrylǵan. Qurylystardyń zańdylyǵyn tekserý maqsatynda derekter Ekologııa, geologııa jáne tabıǵı resýrstar mınıstrligine joldanǵan. Sıfrlanǵan orman alqaptarynyń jalpy aýdany 225,9 myń ga quraıdy.
B.Mýsın «Aqyldy qala» júıesin damytý máselesine de toqtaldy. Onyń málimetinshe, Pavlodar Smart city reıtıngisinde 13-orynda tur. Iаǵnı jetildiretin salalar jeterlik.
– Pavlodar qalasynda ár 100 adamǵa 2 beınekameradan keledi. Bul álemdik kórsetkishterden 7 ese az. Mysaly, AQSh-ta 100 adamǵa 15 kameradan keledi. Sondaı-aq Pavlodarda basqa óńirlermen salystyrǵanda turǵyn úı-kommýnaldyq sektor uıymdarynyń qyzmetterin berý áli kúnge deıin avtomattandyrylmaǵan. Turǵyn úı-kommýnaldyq sektor qyzmetterin sıfrlandyrý boıynsha jumystar óńirlik geoaqparattyq portaldar bazasynda júrgizilýde, – dep atap ótti mınıstr.
Sapar barysynda sıfrly vedomstvo basshysy «Jylygai-Teplitsa» óńirlik IT-Hub-tyń jumysymen tanysyp, Pavlodar oblysynyń IT-qaýymdastyǵymen kezdesti. Jıyn barysynda B.Mýsın Sıfrlyq damý, ınnovasııalar jáne aeroǵarysh ónerkásibi mınıstrligi 2025 jylǵa deıin 100 myń IT-maman daıarlaý kózdelgenin aıtty. Bul úshin baǵdarlamalaý mektepterine granttar úlestirilmek. О́tken jyldyń sońynda 13 IT-mektepke 100 grant berilipti. Granttyń quny 600 myń teńgeni quraıdy. Bıyl taǵy 3 myń grant bólinedi dep kútilýde.
2021 jyly Toraıǵyrov ýnıversıteti bazasynda ashylǵan IT-mektep búginniń ózinde 7 kýrs boıynsha mamandar daıarlaıdy eken. Qazirgi ýaqytta 108 sertıfıkat berilgen. Onyń 63-i IT salasyndaǵy kýrstar boıynsha úlestirilgen. Bilikti IT-mamandardy daıarlaý boıynsha oń dınamıkany eskere otyryp, Pavlodar oblysynda IT-hab qurý jáne ekojúıeni damytý qajet ekeni aıtyldy.
Jumys saparynyń sońynda Baǵdat Mýsın Pavlodar oblysynyń ákimi Ábilqaıyr Sqaqovpen kezdesip, óńirdi sıfrlandyrý salasyn damytý jónindegi ózekti máselelerdi talqylady.
Pavlodar oblysy