Qaraǵandy oblysyndaǵy oqyrman men kórermen qaýymnyń aqparattyq suranysyn qanaǵattandyrý jolynda qalam qýatymen qyzmet etip júrgen jýrnalısterdiń Whatsapp messendjerinde ortaq chaty bar. Birde osy alańqaıda «Qaı vedomstvonyń baspasóz hatshysynyń qyzmeti qapysyz?» degen syńaıdaǵy beıresmı saýalnama júrgizildi. Sonda oblys jýrnalısteriniń túgelge derligi «Baqytjan Qudııarov» dep oılanbastan jazdy.
Al oblystyq Polısııa departamentiniń Ishki jáne syrtqy kommýnıkasııa basqarmasynyń basshysy Baqytjan Qudııarov bolsa, óziniń jumysyndaǵy basty maqsat memlekettik organ men jýrnalıster arasyndaǵy «altyn kópir» bolýǵa umtylý ekendigin aıtady.
Baqytjannyń kindik qany tamǵan Aqmola oblysyndaǵy Býrabaı aýdanynyń Mádenıet aýylynda jalǵyz telekanal – «Habar» arnasy ǵana kórsetýshi edi. Bala Baqytjan kógildir ekrannan kúnde habar taratatyn Zeıin Álipbekti aýzyn ashyp, kózin jumyp tyńdaıtyn. О́skende osy aǵadaı bolsam dep arman etti, eliktegeni de ras edi...
Orta mektepti bitirgennen keıin jýrnalıst bolsam degen arman Qaraǵandy qalasyndaǵy akademık E.Bóketov atyndaǵy QarMÝ-dyń jýrnalıstıka bólimine alyp kelgen. Ýnıversıtet qabyrǵasynda júrgeninde Maratbek Toqmyrza syndy jýrnalıstıkadaǵy ulaǵatty ustazyna uqsap baqqany da ras-tuǵyn.
Al qolyna dıplom alyp, ol kezde «Qazaqstan-Qaraǵandy» dep atalatyn oblystyq telearnaǵa kelgeninde, sondaǵy belgili jýrnalıster Jeńis Sarmurzın men Nurlan Ábildın syndy tájirıbeli mamandardan tálim-tárbıe alyp, televızııaǵa qatysty kóp dúnıeni boıyna sińirdi.
Álbette, oblystyń mańdaıaldy telearnasy bul sııaqty óndirdeı jasty birden jumysqa almaǵan. Áýeli óndiristik is-tájirıbeden ótti. Sóıtip júrgeninde, birde avtokólikterge qatysty alaıaqtardyń atyshýly «Avtopıramıda» dep atalǵan qylmystyq toby qolǵa túsip, sol jónindegi baspasóz máslıhatyna qazaq redaksııasy atynan jas Baqytjandy da jibergen redaktorlar.
Baspasóz máslıhatynan keıin sol kezde oblystyq IIB bastyǵynyń orynbasary bolyp qyzmet etken Qaırat Dúısenbekovke qazaq tilinde suraq qoıǵany bar-tyn. Dál osy sátte janyna dembelshe kelgen jigit aǵasy kelip, munyń suraqtaryna ózi jaýap beretinin aıtyp, shetke qaraı ońasha shyǵaryp alǵan. Sóıtse, bul azamat oblystyq IIB-nyń baspasóz hatshysy Jańataı Sembekov eken. Tájirıbeli maman jas jigittiń jumysqa degen qulshynysyn baıqap qalǵan bolsa kerek, ishki ister organdaryna qyzmetke shaqyrǵan.
Sóıtip, 2008 jyldyń qazan aıynda qazirgi Álıhan Bókeıhan, burynǵy Oktıabr aýdandyq ishki ister bólimindegi memlekettik til jáne aqparat tobynyń ınspektory bolyp jumysqa turdy. Keıin bul qurylym jabylyp, Qaraǵandy qalalyq II basqarmasy bolyp quryldy da, bul osynda jumysqa aýysty.
Dál osy tusta polısııanyń ımıdjin kóterý maqsatynda oblystyq «Qazaqstan-Qaraǵandy» telearnasynda «Zań jáne zaman» baǵdarlamasy ashylǵan bolatyn. Muny júrgizý bul kezde ájeptáýir tájirıbe jınaqtap, tanymal bolyp qalǵan Baqytjan Qudııarovqa júkteldi. Osyndaı jaýapkershilik júgi men zor senim artylǵan jas mamannyń qyzmeti de aýysyp, endi ol oblystyq IIB-da jumys isteı bastady. Memlekettik til jáne aqparat tobynyń ınspektory, aǵa ınspektory boldy.
Al 2012 jyly sol kezdegi Qaraǵandy oblystyq IIB bastyǵy Nurlan Rahymberlınniń buıryǵymen memlekettik til jáne aqparat basqarmasy basshysynyń orynbasary bolyp taǵaıyndaldy. Al 2016 jyldan beri Ishki jáne syrtqy kommýnıkasııa basqarmasy dep atalatyn qurylymdaǵy toǵyz qyzmetkerden turatyn ujymǵa jetekshilik etip keledi.
Polısııanyń el ishindegi ımıdjiniń jaqsarýyna qoǵam da múddeli bolýy kerek dep sanaıdy Baqytjan Qudııarov. Eki taraptyń múddesi túıisken jerde túbi túsinistiktiń ornaıtynyna senimdi ol. «Myna soltústiktegi kórshimizge qarasańyz, polısııa týraly nebir jaǵymdy serıaldar, derekti fılmder túsirip tastaǵan. Bul taqyrypqa qatysty baǵdarlamalarynyń ózi qanshama deseńizshi?! Iаǵnı bizge de bul salada saqshylardyń abyroı-bedelin kóteretin dúnıelerge kóńil bóle bastaǵanymyz jón shyǵar», dep oı tujyrady B.Qudııarov.
Baqytjan sońǵy kezderi keıbir blogerlerdiń kelsin-kelmesin polısııa qyzmetkerlerin kelemejdep, ataq shyǵarǵysy keletin teris qylyqtaryna qynjylady. «Álbette, buǵan tártip saqshylary ózderiniń minsiz qyzmetimen, kásibı biliktiligimen toıtarys berýi kerek», dep sanaıdy B.Qudııarov.
Osy maqala redaksııaǵa endi jol tartaıyn dep turǵanda, «Egemenniń» Qaraǵandydaǵy qosynyna mynadaı qýanyshty habar jetti. Qaraǵandy oblystyq PD Ishki jáne syrtqy kommýnıkasııa basqarmasynyń basshysy Baqytjan Qudııarovqa podpolkovnık sheni berilgen eken. Sol-aq eken, joǵaryda aıtqan jýrnalıster chatynda oryssha-qazaqsha aralas «Siz úshin shyn qýanyshtymyn. Qańtar oqıǵasy kezinde habar tarataıyn dep kelgenimde, sizdiń ózińizdi adam retinde jaqsy qyryńyzdan kórsetkenińiz esimde», «Jaqsy adamdardyń jaqsylyǵyna qýanamyz!», «Laıyqtysyz!», «General bolyńyz!» degen syńaıdaǵy aqjarma tilekter qarsha jaýyp ketti.
QARAǴANDY