Eńbek mınıstrliginiń málimetinshe, 2021-2025 jyldarǵa arnalǵan kásipkerlikti damytý jónindegi Ulttyq joba aıasynda 2,2 myńnan astam múgedek turaqty jumys oryndaryna jáne 5 myńnan astam adam ýaqytsha jumysqa ornalastyryldy, dep habarlaıdy Egemen.kz.
Sonymen qatar osy jyldyń I toqsanynda halyqty jumyspen qamtý ortalyqtarynyń joldamasy boıynsha jumys berýshiler múgedektigi bar 348 adamdy jumysqa qabyldady.
«Bıyl kórý, estý jáne tirek-qımyl apparaty buzylǵan adamdar úshin 71 arnaıy jumys ornyn qurý qarastyrylǵan, jumys berýshilerdiń jabdyqtalýyna baılanysty shyǵyndaryn sýbsıdııalaý qarastyrylǵan», delingen Eńbek jáne halyqty áleýmettik qorǵaý mınıstrliginiń habarlamasynda.
Sonymen qatar QR Kásipodaqtar federasııasymen birlesken «Halyqtyq baqylaý» áleýmettik mańyzy bar jobasy múgedek adamdardy «halyqtyq baqylaýshylar» retinde tartýdy kózdeıdi. Búginde jobaǵa 164 kásiporyn jumyldyrylyp, 521 qyzmetker jumysqa ornalastyryldy.
Vedomstvoda atap ótkendeı, múmkindigi shekteýli adamdar beınebaqylaý operatorlary retinde jumysqa qabyldanady, olar jumys oryndarynda eńbek qaýipsizdigi men eńbekti qorǵaý talaptarynyń saqtalýyn qadaǵalaıdy.
Jobaǵa qatysý úshin kadrlardy irikteý kezinde múgedektikti (óndiristik jaraqat, kásiptik aýrý, jalpy aýrý) belgileý sebebi boıynsha kásiporynda jumysyn tastap ketken qyzmetkerlerge artyqshylyq beriledi.