«Tumar» ulttyq televızııalyq báıgesi óz máresine jetti. Bıylǵy baıqaýdyń ereksheligi sol – saltanatty is-shara jýrnalıster kúnimen tuspa-tus keldi. Jáne bir atap óter jańalyq, alǵash ret joǵary memlekettik nagradalar kásibı merekege arnaıy oraılastyrylyp, BAQ salasynyń birqatar qaıratkeri men bilikti ókiline tapsyryldy. Memleket basshysy Qasym-Jomart Toqaevtyń bul qadamyn jýrnalıstıkanyń ádiletti qoǵam qurýdaǵy mańyzyna nazar salǵany deýge negiz bar.
«Tumar» baıqaýynyń jeńimpazdary anyqtaldy
Qyzyl kilem, sáni men máni kelisken bezendirý, ásem kıingen telemamandardyń shat-shadyman kóńil kúıi jýrnalısterdiń tól dýmany, kásibı merekesinde erekshe áser syılady. «Qazmedıa» ortalyǵynyń konsert zalynda ótken teleóner toıyna Premer-Mınıstrdiń orynbasary Eraly Toǵjanov, Memlekettik keńesshi Erlan Qarın, Amanat partııasynyń Atqarýshy hatshysy Ashat Oralov, Aqparat jáne qoǵamdyq damý mınıstri Asqar Omarov, Parlament Senatynyń depýtattary Dana Nurjigit, Darhan Myńbaı, Nur-Sultan qalasynyń ákimi Altaı Kólginov, «Egemen Qazaqstan» RG» JShS bas dırektory Darhan Qydyráli, QAZAQSTAN RTRK AQ basqarma tóraǵasy Lázzat Tanysbaı, «Habar» agenttigi» AQ basqarma tóraǵasy Berik Ýálı, Prezıdent Teleradıokesheniniń bas dırektory Raýshan Qajybaeva, memleket jáne qoǵam qaıratkerleri, qazaq televızııasynyń ardagerleri men jýrnalıster, estrada ánshileri qatys- ty.
2017 jyldan beri jyl saıyn qazaq televızııasy úzdikterin anyqtap, telejýrnalısterdiń kásibı dárejesin kóterýge arnalǵan «Tumar» syılyǵy bıyl 10 atalym boıynsha júzden júırik shyqqan myqtylarǵa buıyrdy. Saraptaý alqasyna 300-ge jýyq ótinim kelip túsken, eń kóp ótinim «Úzdik derekti fılm», «Úzdik aqparattyq baǵdarlama», «Úzdik áleýmettik joba», «Úzdik telejýrnalıst», «Úzdik telejúrgizýshi» atalymdary boıynsha qabyldanǵan.
Sonymen báıge qorytyndysy boıynsha eń aldymen Premer-Mınıstrdiń orynbasary Eraly Toǵjanov «Úzdik derekti fılm» atalymynyń jeńimpazyn jarııalady. Munda ATYRAY telearnasy túsirgen «Kaspııden ketken qypshaqtar» fılmi top jardy.
«Úzdik aqparattyq baǵdarlama» júldesine ASTANA TV telearnasynyń Saraptimes baǵdarlamasy laıyq dep tanyldy. Músinsheni Nur-Sultan qalasynyń ákimi Altaı Kólginov tabystady.
«Úzdik áleýmettik joba» atalymynda «KTK» telearnasynyń «Daý-damaısyz» jobasy kósh bastady. Ony Prezıdent Teleradıokesheniniń bas dırektory Raýshan Qajybaeva tabys etti.
«Úzdik tok-shoý» júldesin jýrnalıst Kemelbek Oıshybaev berdi, bul júldeni «Atameken Business» telearnasynyń «Vremıa govorıt» jobasy jeńip aldy.
«Úzdik oıyn-saýyq baǵdarlamasy» atalymynda «Almaty» telearnasy ázirlegen «Almaty Bala Fest» jobasy úzdik atandy. Júldeni Senat depýtaty Dana Nurjigit tapsyrdy.
«Úzdik televızııalyq serıal» syılyǵyn tabystaý úshin sahnaǵa «Ekspress-K» gazetiniń bas redaktory Aleksandr Aksıýtıs shaqyryldy. Munda qazylar alqasynyń sheshimimen Qazaqstan ulttyq telearnasy túsirgen «Ahmet. Ult ustazy» úzdik serıal atandy.
Sonymen birge aımaqtar arasynda Turkistan telearnasy «Úzdik aımaqtyq telearna» atandy. Bul syılyqty Amanat partııasynyń Atqarýshy hatshysy Ashat Oralov tabystady.
«Úzdik rejısserlik jumys» nomınasııasynda «Qazaq TV» telearnasynyń «Jena» jobasy top jardy.
«Úzdik telejýrnalıst» júldesin Májilis depýtaty Darhan Myńbaı tabys etti. Munda «Habar 24» telearnasynyń Ońtústik Koreıadaǵy menshikti tilshisi Vladıslav Soı jeńimpaz atandy. V.Soı saltanatty marapattaý keshine Seýlden tikeleı efırge shyqty.
Kesh sońynda «Úzdik telejúrgizýshi» atalymynda «31 arna» telejúrgizýshisi Asqar Meńdibaev jeńimpaz atandy. Júldeni Aqparat jáne qoǵamdyq damý mınıstri Asqar Omarov tabystady.
«Ádilqazy alqasynyń arnaıy syılyǵy» «Balapan» telearnasyna buıyrdy. Arnaıy syılyqpen Erlan Qarın marapattady.
Aıta ketsek, «Tumar» júldesin marapattaý keshinde Balalar jylyna erekshe mán berildi. Keshti balalar júrgizdi jáne barlyq jeńimpaz balalarmen birge sahnaǵa shyqty.
«Tumar» ulttyq televızııalyq báıgesi 2017 jyly Aqparat jáne qoǵamdyq damý mınıstrliginiń bastamasymen qurylǵan. Jeńimpazdar qazaqstandyq televızııany damytýǵa qosqan úlesi úshin «Tumar» músinshesi men 1 mıllıon teńge kóleminde aqshalaı syıaqy aldy.
Sóıtip, telejuldyzdar «Tumar» syılyǵyn ıelenip, kásibı mereıin ósirgen mazmundy kesh sońy estrada ánshileriniń tamasha óner kórsetýine ulasyp, jeńimpazdarǵa estelik kýbok tabys etildi.
Kásibı merekeniń sharyqtaý shegi
Prezıdenttiń Jarlyǵymen bıyl elimizde alǵash ret kásibı merekesinde jýrnalısterge memlekettik marapattar, joǵary ordender berilip otyr. Ony Aqparat jáne qoǵamdyq damý mınıstri Asqar Omarov arnaıy ózi kelip tapsyrdy. Bul jańa úrdis aqparat salasynyń maıtalmandaryna kórsetilgen aıryqsha qurmet dep baǵaladyq.
Birqatar memlekettik BAQ salasyndaǵy jýrnalısterge «Eren eńbegi úshin» medali, Qazaqstan Prezıdentiniń Qurmet gramotasy, Qazaqstan Prezıdentiniń Alǵyshaty, «Shapaǵat» medali tabystaldy. Osy topta Egemen Qazaqstan gazeti bas redaktorynyń orynbasary, qazaq jýrnalıstıkasynda uzaq jyldar boıy talmaı eńbek etip kele jatqan tanymal jýrnalıst Talǵat Batyrhan «Qurmet» ordenimen marapattaldy. Sonymen qatar búginde bir ujymǵa biriktirilgen «Kazahstanskaıa pravda» gazetiniń belgili fototilshisi, Jeltoqsan oqıǵasynda túsirgen birshama tarıhı fotolardyń avtory Iýrıı Bekker de «Qurmet» ordenin óńirine taqty. О́z ıesin tapqan marapat qashanda qundy bolsa kerek.